Bıyl kúrish pen maqta alqaby taǵy azaıdy - AShM
ASTANA. KAZINFORM – Bıyl bıdaı alqaby 12,1 mln gektar.
Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Memleket basshysynyń tapsyrmasy boıynsha egis alqaptaryn odan ári ártaraptandyrý jumystary jalǵasyp keledi. Osyǵan baılanysty bıyl dándi daqyldar alqaby 127 myń gektarǵa qysqarady. Onyń ishinde bıdaı alqaby 125 myń gektarǵa qysqaryp, 12,1 mln gektar bolady. Sýdy únemdeý maqsatynda Sý resýrstary jáne ırrıgatsııa mınıstrliginiń derekterine sáıkes, kúrish pen maqta alqabyn azaıtý jumystary iske asyp jatyr. Osylaısha, Memleket basshysynyń tapsyrmasyna sáıkes, bıyl alǵash ret egis qurylymy naqty sý lımıtine sáıkes bekitildi, - dedi A.Sultanov.
Onyń aıtýynsha, el boıynsha kúrish alqaby 20,2 myń gektarǵa qysqartyldy. Al maqta alqaby 162,4 myń gektar. Onyń ishinde tamshylatyp sýarý 29,8 myń gektarǵa kóbeıedi, al dástúrli sýarý 12 myń gektarǵa qysqarady.
- Búginde egis jumystary barlyq óńirde bastaldy. Jalpy 4,5 mln gektar alqapqa egis egildi. Onyń ishinde dándi daqyldar – 2 mln gektarǵa jýyq, maıly daqyldar – 1 mln gektardan astam, azyqtyq daqyldar –388 myń gektar, kókónis-baqsha jáne kartop – 206,3 myń gektar, maqta – 154 myń gektar. Jalpy, egis naýqany bastalǵanǵa deıin topyraqty daıyndaý jumystary júrgizildi. Atap aıtqanda, ylǵal jabý, topyraqty óńdeý, kóktemgi jyrtý jumystary oryndaldy. Sonymen qatar mınıstrlik jalpy kólemi 400 myń gektarǵa jýyq kúzdik daqyldardyń jaı-kúıine monıtorıng júrgizip jatyr. Qazirgi kezde kúzdik egisterdiń 94%-y ońtaıly jaǵdaıda, - dedi vıtse-mınıstr.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
