Bıyl quny 1,5 mlrd dollar bolatyn ınvestıtsııalyq jobalar iske qosylady
ASTANA. KAZINFORM – Bıyl quny 1,5 mlrd dollar bolatyn ınvestıtsııalyq jobalar iske qosylady. Bul týraly Májilistiń Halyqaralyq ister, qorǵanys jáne qaýipsizdik komıtetiniń otyrysynda Syrtqy ister mınıstriniń orynbasary Nazıra Nurbaeva aıtty.
«2024 jyly 1,5 mlrd AQSh dollarynan astam somaǵa sheteldik qatysýy bar 40-qa jýyq ınvestıtsııalyq joba paıdalanýǵa beriledi dep kútilýde. Olardyń ishinde «Buǵyty» volfram ken ornyn ıgerý jáne qýattylyǵy jylyna 3,3 mln tonna volfram keni bolatyn Almaty oblysynda taý-ken baıytý kombınatyn salý syndy mańyzdy jobalar bar. Joba qytaılyq Jiaxin International Resources kompanııasynyń qatysýymen iske asyrylyp jatyr», - dedi ol.
Mınıstr orynbasary usynǵan derekke sáıkes, reseılik TehnoNıkol kompanııasy Almaty oblysynda jylý oqshaýlaǵysh materıaldar óndirisin iske qosýǵa nıetti. Al ıtalıandyq Cormatex kompanııasy Aqtóbe oblysynda toqyma emes materıaldar shyǵaratyn zaýytty iske qosýdy josparlap otyr.
Sonymen qatar Nazıra Nurbaeva Memleket basshysynyń tapsyrmasymen ótken jyly elimizde otandyq jáne sheteldik ınvestorlardyń shıkizattyq emes sektor jobalarynan turatyn ınvestıtsııalyq jobalardyń jalpyulttyq pýly qalyptastyrylǵan atap ótti. Búgingi tańda ol quny shamamen 25,4 trln teńge bolatyn 609 jobadan turady jáne 115 myńnan astam jumys ornyn qurýdy kózdeıdi. Onyń ishinde 14 trln somaǵa 106 joba sheteldik, 11,2 trln teńge somaǵa 503 joba otandyq ınvestorlardyń qatysýymen júzege asyrylady.
