Bıyl kúnbaǵys alqaptarynyń aýdany 1,4 mln gektarǵa jetýi múmkin
ASTANA. KAZINFORM — Bıyl maıly daqyldar alqabynyń aýdanyn 3,3 mln gektarǵa deıin jetkizý josparlanyp otyr.
Premer-mınıstrdiń orynbasary — Ulttyq ekonomıka mınıstri Serik Jumanǵarın Májilis depýtatynyń saýalyna joldaǵan jaýapta bıyl kúnbaǵys alqaptarynyń aýdany 1,4 mln gektarǵa jetýi múmkin ekenin aıtty.
— Bıyl maıly daqyldar alqabynyń aýdanyn 3,3 mln gektarǵa deıin jetkizý josparlanyp otyr. Onyń ishinde kúnbaǵys alqabyn 1,4 mln gektarǵa jetkizý úshin qosymsha 121,2 myń gektarǵa tuqym sebý kózdelgen, — dep jazady Serik Jumanǵarın.
Aıta ketý kerek, Jerge ornalastyrý jumystary jónindegi memlekettik ınstıtýttyń málimeti boıynsha, elimizde 29,9 mln gektar jer tozǵan. Saldarynan topyraq qunarlylyǵy 17% tómendep, sýarmaly alqaptardaǵy sortańdy jerler 35-37% artqan.
— Egis alqaptaryn qysqartý máselesine kelsek, negizinen bıdaı jekelegen túrlerine arnalǵan alqaptar men sý kóp tutynatyn daqyldardyń alqabyn azaıtýǵa kóńil bólemiz. Sondaı-aq, maıly, baqsha, jemshóp sııaqty tabysy joǵary daqyldardyń alqabyn keńeıtý josparlanǵan, — delingen jaýapta.
Vıtse-premerdiń aıtýynsha, 2024 jyly maıly daqyldardy sýbsıdııalaýǵa 2,6 mlrd teńge bólingen.