Bıyl Qosshy qalasynda NVIDIA B300 bazasyndaǵy jańa sýperkompıýter iske qosylady
ASTANA. KAZINFORM – Prezıdent Qasym-Jomart Toqaev «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaıdy Aqorda.
Memleket basshysyna Qordyń bıylǵy bes aıdaǵy jumys qorytyndylary jáne orta merzimdi kezeńge arnalǵan damý jospary týraly esep berildi.
Nurlan Jaqypov 2025 jyldyń qorytyndysy boıynsha Qor basqarýyndaǵy aktıvter 88 mıllıard dollardy quraǵanyn aıtty.
Aýqymdy ınfraqurylymdyq jáne ónerkásiptik jobalardy júzege asyrý jalǵasýda. Bıyl 3,3 trıllıon teńgege 16 jobany júzege asyrý josparlanyp otyr. Atap aıtqanda, Moıynty – Qyzyljar, Darbaza – Maqtaaral jańa temirjol jelileriniń qurylysy, Qashaǵandaǵy gaz óńdeý zaýyty, Almaty ekinshi jylý elektr ortalyǵyn jańǵyrtý, gıbrıdti elektr stantsııasyn salý jáne Kaspıı teńiziniń tabanyna talshyqty-optıkalyq jeli tóseý jobalary qolǵa alynǵan.
Bul bastamalar elimizdegi kólik, energetıka jáne tsıfrlyq ınfraqurylymdy nyǵaıtýǵa, jańa jumys oryndaryn ashýǵa, sondaı-aq halyqtyń turmys sapasyn arttyrýǵa múmkindik beredi.
Qor jobalary ujymdyq áleýmettik jaýapkershilik aıasynda jylyna shamamen 1 mıllıon qazaqstandyqqa qoldaý kórsetetini jóninde baıandady.
Budan bólek, «Taza Qazaqstan» jalpyhalyqtyq ekologııalyq aktsııasy sheńberinde el aýmaǵy boıynsha 5 mıllıon kóshet egý kózdelgen. Bul rette 2024-2025 jyldary 5,8 mıllıon aǵash otyrǵyzylǵan.
Jalpy, 2023-2026 jyldar aralyǵynda 856 mıllıard teńgege 100-den asa áleýmettik joba júzege asyrylǵan.
Bıyl qazan aıynda Qosshy qalasynda NVIDIA B300 bazasyndaǵy jańa sýperkompıýterdi iske qosý josparlanǵanyn málimdedi.
Jańa klaster jumys isteı bastaǵan soń «Qazaqtelekom» portfeldik kompanııasyndaǵy sýperkompıýter qýaty tórt ese artady. Bul elimizdiń jasandy ıntellekt, derekterdi óńdeý jáne ónimi joǵary esepteýish salasyndaǵy múmkindikterin aıtarlyqtaı keńeıtýge múmkindik beredi.
Memleket basshysy Qordyń negizgi jumys baǵyttary, sonyń ishinde basty ınvestıtsııalyq jobalardy ýaqtyly iske asyrý boıynsha birqatar mindet júktedi.
Aıta keteıik, Memleket basshysy Marat Omarovty qabyldady.
