Bıyl kolledjge qujat qabyldaý qashan bastalady
ASTANA. KAZINFORM — Oqý-aǵartý mınıstriniń 2026 jylǵy 1 maýsymdaǵy buıryǵyna sáıkes, tehnıkalyq jáne kásiptik, orta bilimnen keıingi bilim berý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryna ózgerister engizildi.
Osylaısha, tehnıkalyq jáne kásiptik bilim berý uıymdarynda (TjKB) oqýǵa qabyldaý, ótinishterdi qaraý, áńgimelesý ótkizý jáne bilim alýshylar qataryna qabyldaý jumystaryn uıymdastyrý úshin 10 maýsymnan keshiktirilmeı uıym basshysynyń buıryǵymen qabyldaý komıssııasy qurylady. Komıssııa quramy músheleriniń sany taq bolýy tıis.
Qabyldaý komıssııasynyń quramyna Qamqorshylyq keńestiń ókilderi (ol bolmaǵan jaǵdaıda — jumys berýshilerdiń ókilderi), qoǵamdyq uıymdar men bilim berý uıymdarynyń ókilderi kiredi.
Qabyldaý komıssııasynyń tóraǵasy bolyp TjKB uıymynyń basshysy nemese onyń mindetin atqarýshy tulǵa taǵaıyndalady.
Qabyldaý komıssııasynyń jumysyn hatshy uıymdastyrady. Ol azamattardy qabyldaýdy júrgizedi, ótinishterge jazbasha jaýap beredi, komıssııanyń aqparattyq materıaldaryn daıyndaıdy, áńgimelesýlerdi, emtıhan aldyndaǵy konsýltatsııalardy, arnaıy jáne shyǵarmashylyq emtıhandardy uıymdastyrady, sondaı-aq emtıhan jáne jazbasha jumystardy kodtaý jáne dekodtaý jumystaryn oryndaıdy.
Hatshy qabyldaý komıssııasynyń múshesi bolyp sanalmaıdy.
Qabyldaý komıssııasynyń jumysynda múddeler qaqtyǵysy týyndaǵan jaǵdaıda onyń quramy qaıta qaralady.
Karantın nemese áleýmettik, tabıǵı jáne tehnogendik sıpattaǵy tótenshe jaǵdaılar kezinde qabyldaý jáne emtıhan komıssııalarynyń jumysy tsıfrlyq tehnologııalardy qoldaný arqyly júzege asyrylady.
Sonymen qatar talapkerlerden qujat qabyldaý merzimderi naqtylandy.
Tehnıkalyq jáne kásiptik, orta bilimnen keıingi bilim berý baǵdarlamalary boıynsha orta býyn mamandary men qoldanbaly bakalavrlardy daıarlaýǵa ótinishterdi qabyldaý:
— memlekettik bilim berý tapsyrysy boıynsha kúndizgi oqý nysanyna (negizgi orta, jalpy orta, tehnıkalyq jáne kásiptik, orta bilimnen keıingi bilim bazasynda) — kúntizbelik jyldyń 25 maýsymynan 22 tamyzyna deıin;
— aqyly negizde — 25 maýsymnan 27 tamyzǵa deıin;
— keshki jáne syrttaı oqý nysany boıynsha — 25 maýsymnan 20 qyrkúıekke deıin;
— shyǵarmashylyq daıyndyqty talap etetin mamandyqtar boıynsha — 25 maýsymnan 20 shildege deıin;
— pedagogıkalyq mamandyqtar boıynsha (negizgi orta, jalpy orta, tehnıkalyq jáne kásiptik, orta bilimnen keıingi bilim bazasynda) — 25 maýsymnan 10 tamyzǵa deıin;
— medıtsınalyq mamandyqtar boıynsha: negizgi orta bilim bazasynda — 25 maýsymnan 10 tamyzǵa deıin, al jalpy orta, tehnıkalyq jáne kásiptik, orta bilimnen keıingi bilim bazasynda — 25 maýsymnan 15 tamyzǵa deıin.
Memlekettik qyzmetterdi alý:
— Qazaqstan Respýblıkasynyń orta, tehnıkalyq jáne kásiptik, orta bilimnen keıingi, sondaı-aq joǵary jáne joǵary oqý ornynan keıingi bilim berý uıymdarynyń túlekteri úshin «elektrondyq úkimet» veb-portaly arqyly;
— al bilim týraly qujattary tsıfrlandyrylmaǵan burynǵy jyl túlekteri, sheteldik oqý oryndarynyń túlekteri, sondaı-aq qylmystyq-atqarý júıesi mekemelerindegi adamdar úshin — tehnıkalyq jáne kásiptik bilim berý uıymdary arqyly júzege asyrylady.
Portal nemese Ulttyq bilim berý derekter qory (UBDQ) jumysynda tehnıkalyq aqaý bolǵan jaǵdaıda qujat qabyldaý jergilikti atqarýshy organdar aıqyndaıtyn aqparattyq júıeler arqyly júzege asyrylady.
Qujattar memlekettik qyzmet kórsetý talaptaryna sáıkes usynylady.
Qajet bolǵan jaǵdaıda talapker «bir ótinish» qaǵıdaty boıynsha jataqhana alý jáne tegin tamaqtaný qyzmetterine de ótinish bere alady.
Ótinish nátıjeleri qabyldaý qorytyndysy boıynsha usynylady.
Oqýǵa qabyldanǵannan keıin bilim alýshy 3 kún ishinde elektrondyq oqytý shartyn qol qoıýy tıis. SMS-habarlama mGov qosymshasynyń Bilim servısi arqyly jiberiledi.
Talapkerlerdiń ótinishteri Ulttyq bilim berý derekter bazasynda (UBDB) tirkeledi.
Tehnıkalyq jáne kásiptik bilim berý uıymdaryna túsýshilermen (jumysshy mamandyqtary jáne orta býyn mamandyqtary boıynsha) áńgimelesý ótkiziledi. Áńgimelesý 20 mınýttan aspaıdy.
Arnaıy nemese shyǵarmashylyq emtıhandardyń suraqtary men baǵalaý krıterıılerin qabyldaý komıssııasynyń tóraǵasy bekitedi.
Arnaıy bilim berý qajettiligi bar balalar úshin de áńgimelesý qarastyrylǵan. Olardyń ata-analary nemese zańdy ókilderi tıisti qujattardy (psıhologııalyq-pedagogıkalyq minezdeme jáne t. b.) usynady.
Qashyqtan jaǵdaılarda áńgimelesý onlaın formatta ótkizilip, beınejazbaǵa túsiriledi jáne 3 jyl saqtalady.
Oryn sany shekteýli bolǵan jaǵdaıda qabyldaý konkýrs jáne ortasha ball negizinde júzege asyrylady.
Arnaıy bilim berý qajettiligi bar tulǵalardy qabyldaý medıtsınalyq jáne psıhologııalyq-pedagogıkalyq qorytyndylar negizinde júrgiziledi.
2026 jylǵy 12 shildeden bastap:
Grantqa úmitkerler kásibı dıagnostıkadan (erikti túrde anketalaý) ótedi. Pedagogıkalyq, medıtsınalyq jáne shyǵarmashylyq mamandyqtarǵa túsýge úmitti túlekter arnaıy nemese psıhometrııalyq testileýge jiberiledi.
Pedagogıkalyq, medıtsınalyq jáne óner salasy mamandyqtaryna túsýshiler arnaıy emtıhandar tapsyrady.
Medıtsınalyq mamandyq tańdaǵandar esse jazady.
Aǵylshyn tilinde oqytylatyn mamandyqtarǵa túsýshiler úshin qosymsha tildik áńgimelesý ótkiziledi.
Áńgimelesý nátıjeleri «Ruqsat etildi» / «Ruqsat etilmedi» túrinde baǵalanady.
Buıryq 2026 jylǵy 19 maýsymnan bastap kúshine enedi.
Aıta keteıik, 5 myńnan astam kolledj oqytýshysy biliktiligin arttyrdy.
