Bıyl kolledjderge 133 myń stýdent qabyldanady
ASTANA. KAZINFORM — Bıyl memlekettik bilim berý tapsyrysy aıasynda kolledjderge 133 myń stýdent qabyldanady. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
— Elimizde 763 kolledj jumys isteıdi, onda 556 myń stýdent bilim alady. Tehnıkalyq jáne kásiptik bilim berýdiń qoljetimdiligin qamtamasyz etý maqsatynda bıyl memlekettik bilim berý tapsyrysy aıasynda kolledjderge 133 myń stýdentti qabyldaý josparlanǵan. Memlekettik bilim berý tapsyrysynyń 70 paıyzy tehnıkalyq baǵyttar boıynsha kadrlar daıarlaýǵa baǵyttalady. Kásiporyndardyń ótinimderi negizinde keıinnen mindetti túrde jumysqa ornalastyrýdy qarastyra otyryp, 10 myńnan astam stýdentti qabyldaý kózdelgen. Bıyl kolledjderge qujattardy qabyldaý «OQU» biryńǵaı platformasy arqyly júzege asyrylady, — dedi mınıstr.
Onyń aıtýynsha, jumys berýshilermen birlesip kásiptik standarttardyń, Memlekettik jalpyǵa mindetti bilim berý standarttarynyń jáne WorldSkills standarttarynyń talaptaryn eskere otyryp, shamamen 500 bilim berý baǵdarlamasy ázirlenip, jańartyldy. 27 kolledjde bilim berý baǵdarlamalarynyń halyqaralyq salalyq jáne kásiptik talaptarǵa sáıkestigin baǵalaý rásimi ótkizildi.
— Akkredıtteý qorytyndysy boıynsha 134 pedagog pen 347 stýdent halyqaralyq sertıfıkattarǵa ıe boldy. Jyl basynan beri sheteldik kolledjdermen akademııalyq utqyrlyq, halyqaralyq salalyq akkredıtteý jáne basqa da máseleler boıynsha 80-ge jýyq memorandým men kelisimge qol qoıyldy, — dedi Juldyz Súleımenova.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
