Bıyl kókjótelmen syrqattanǵandar azaıdy
ASTANA. KAZINFORM – 2026 jyldyń basynan beri Qazaqstanda kókjóteldiń 76 jaǵdaıy tirkeldi. Bul 2025 jyldyń sáıkes kezeńimen salystyrǵanda syrqattanýshylyqtyń 2,8 ese tómendegenin kórsetedi.
Mamandardyń málimetinshe, oń dınamıka vaktsınatsııalaý jáne balalardy tolyqtyryp ımmýndaý jumystarynyń júrgizilýimen baılanysty.
Sonymen qatar syrqattanǵandardyń 88%-y ekpe almaǵan balalar – 67 jaǵdaı. Ekpe almaǵan syrqat balalardyń ishinde:
– 69%-y ata-analardyń profılaktıkalyq ekpelerden bas tartýyna baılanysty vaktsına almaǵan;
– 22%-ynda medıtsınalyq qarsy kórsetilim bolǵan;
– 9%-y ekpe jasyna jetpegen.
Densaýlyq saqtaý mınıstrligi vaktsınatsııalaý kókjóteldiń aldyn alýdyń jáne aýrýdyń aýyr asqynýlarynyń, ásirese erte shaqtaǵy balalardyń arasynda, aldyn alýdyń eń tıimdi tásili bolyp qala beretinin eske saldy.
Osylaısha, bıylǵy 4 aıda kókjótelge qarsy josparly vaktsınatsııalaýmen 178,9 myń bala qamtyldy. Onyń ishinde:
– 1 jasqa deıingi 51,6 myń bala;
– 1 jastaǵy 46,7 myń bala;
– 6 jastaǵy 80,7 myń bala.
Budan bólek, belgilengen merzimde ekpe almaǵan balalardy tolyqtyryp ımmýndaý jalǵasyp jatyr. Jyl basynan beri kókjótelge qarsy vaktsınatsııalaýmen ekpe almaǵandar qatarynan 18 jasqa deıingi 64,6 myń bala men jasóspirim qosymsha qamtyldy. Bul jumys qolda bar vaktsınalar kólemin paıdalana otyryp júrgizilip jatyr.
Densaýlyq saqtaý mınıstrligi medıtsınalyq uıymdarmen birlesip, ınfektsııalyq aýrýlardyń, onyń ishinde kókjóteldiń aldyn alý máseleleri jáne profılaktıkalyq ekpelerdi ýaqytyly alýdyń mańyzdylyǵy boıynsha halyq arasynda turaqty negizde aqparattyq-túsindirý jumystaryn júrgizip jatyr.
Aıta keteıik, maman bala kókjótelmen aýyrmaý úshin der kezinde ekpe alý mańyzdy ekenin aıtqan edi.
