Bıyl kóktemgi dala jumystary kezeńinde kún raıy qanshalyqty qolaıly bolady
ASTANA. KAZINFORM — Jaýyn-shashynnyń normadan az bolýy elimizdiń ortalyq jáne ońtústik-batys óńirlerinde boljanyp otyr. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev málim etti.
- Kóktemgi dala jumystary kezeńinde topyraq ylǵaldylyǵy boıynsha jaǵdaı jalpy qolaıly. Qostanaı, Aqmola, Soltústik, Shyǵys jáne Batys Qazaqstan oblystarynda topyraqtyń metrlik qabatynda ylǵal qory negizinen qanaǵattanarlyq jáne ońtaıly bolady. Aqtóbe, Pavlodar jáne Qaraǵandy oblystarynda – qanaǵattanarlyq. Bul rette, aýa temperatýrasynyń joǵary bolýyna baılanysty topyraqtyń ústingi qabatynyń tez qurǵaýy qaýpi bar. Sondyqtan jekelegen aýdandarda jergilikti ylǵal tapshylyǵy bolýy múmkin. Máselen, Aqtóbe oblysynyń Shalqar jáne Jambyl oblysynyń Qordaı aýdandarynyń jaıylymdarynda qurǵaqshylyq qalyptasýy yqtımal, - dedi E.Nysanbaev.
Onyń aıtýynsha, kún raıy boljamyna sáıkes, mamyr aıynda aýa temperatýrasy normadan 1-2 gradýsqa joǵary bolýy múmkin. Jaýyn-shashyn boıynsha jaǵdaı jalpy turaqty, ıaǵnı eldiń basym bóliginde mólsheri norma shamasynda.
- Jaýyn-shashynnyń normadan az bolýy elimizdiń ortalyq jáne ońtústik-batys óńirlerinde boljanyp otyr. Bul - Qaraǵandy, Túrkistan, Jambyl oblystarynyń basym bóligi, Qostanaı, Aqtóbe jáne Aqmola óńirleriniń ońtústik aýdandary, sondaı-aq Ulytaý jáne Qyzylorda oblystary. Jalpy, mamyr aıynda kún raıy egin egý jumystaryn júrgizýge qolaıly bolady. Maýsym aıynda el aýmaǵynyń basym bóliginde temperatýra normadan 1-2 gradýsqa joǵary bolýy yqtımal. Bul rette respýblıkanyń shyǵysy men ońtústik-shyǵysynda, atap aıtqanda Shyǵys Qazaqstan jáne Almaty oblysy óńirlerinde, Abaı jáne Jetisý oblystarynda, sondaı-aq Pavlodar, Qaraǵandy oblystarynyń shyǵys jartysynda jáne Jambyl oblysynyń ońtústik-shyǵysynda temperatýra norma sheginde bolýy múmkin, - dedi mınıstr.
Sonymen qatar ol eldiń astyqty óńirleriniń basym bóliginde jaýyn-shashyn norma shamasynda bolýy múmkin ekenin aıtty. Jaýyn-shashyn tapshylyǵy ortalyqta jáne ońtústik-batysta baıqalýy yqtımal. Bul – Ulytaý, Aqtóbe oblystary, Qostanaı oblysynyń ońtústigi, Túrkistan oblysynyń soltústigi jáne Batys Qazaqstan óńiriniń ońtústik-shyǵysy.
Budan buryn habarlanǵandaı, bıyl eldegi jalpy egis alańy 23,8 mln gektar boldy.
