Merzimdi áskerı qyzmetten ótken azamattar ulttyq qaýipsizdik rezervin quraıdy
ASTANA. KAZINFORM — Prezıdent Jarlyǵyna sáıkes, 17 naýryzdan bastap qalalyq jáne aýdandyq shaqyrý komıssııalary ákimderdiń orynbasarlarynyń tóraǵalyǵymen azamattardy merzimdi áskerı qyzmetke shaqyrýdy bastady.
Osyǵan oraı Qorǵanys mınıstrliginde 2026 jylǵy kóktemde azamattardy Qarýly kúshterge, basqa da áskerler men áskerı quralymdarǵa merzimdi qyzmetke shaqyrýdy uıymdastyrýǵa arnalǵan keńes ótti.
Atalǵan jıynǵa Qorǵanys mınıstriniń birinshi orynbasary — Qazaqstan Respýblıkasy Qarýly kúshteri Bas shtabynyń bastyǵy general-leıtenant Qanysh Ábýbákirov tóraǵalyq etti.
Keńeske Іshki ister, Densaýlyq saqtaý mınıstrlikteriniń, Ulttyq ulannyń jáne UQK Shekara qyzmetiniń ókilderi qatysty. Oblys jáne respýblıkalyq deńgeıdegi qala ákimderiniń orynbasarlary, sondaı-aq áskerge shaqyrý naýqanyna jaýapty laýazymdy tulǵalar vıdeokonferentsbaılanys arqyly qosyldy.
Jıyn barysynda 2026 jylǵy kóktemgi shaqyrý naýqanyn uıymdastyrý jáne ótkizý, shaqyrý pýnktterinde biryńǵaı tásilder men talaptardy qalyptastyrý, shaqyrý komıssııalarynyń jumysyn jetildirý máseleleri qaraldy. Sonymen qatar áskerge shaqyrý naýqany kezindegi memlekettik organdardyń ózara is-qımylyn jetildirý baǵyttary, ózekti máseleler men olardy sheshý joldary jan-jaqty talqylandy.
Qorǵanys mınıstriniń birinshi orynbasary — Qarýly kúshter Bas shtabynyń bastyǵy general-leıtenant Qanysh Ábýbákirov elimizdiń egemendigi men aýmaqtyq tutastyǵyn qorǵaý áskerdiń jaýyngerlik daıarlyq deńgeıine, jasaqtalýy men kadrlyq áleýetine tikeleı baılanysty ekenin atap ótti.
— Merzimdi áskerı qyzmetten ótken azamattar áskerı-oqytylǵan rezervtiń negizin qalaıdy jáne osy rezerv ulttyq qaýipsizdikke qater tóngen jaǵdaıda elimizdi qorǵaýǵa shuǵyl tartylady. Sol sebepti azamattardy merzimdi áskerı qyzmetke shaqyrý memlekettiń basty mindetteriniń biri bolyp qala beredi, — dedi general-leıtenant Qanysh Ábýbákirov.
Keńeste Bas shtab bastyǵynyń orynbasary — Uıymdastyrý-jumyldyrý jumystary departamentiniń bastyǵy general-maıor Almas Isabekov baıandama jasady. Ol óz sózinde 2025 jylǵy áskerge shaqyrý nátıjeleri men bıylǵy kóktemde azamattardy merzimdi áskerı qyzmetke shaqyrýdy uıymdastyrý sharalary týraly egjeı-tegjeıli málimet berdi.
Bıylǵy kóktemgi naýqan aıasynda 30 maýsymǵa deıin 18-27 jas aralyǵyndaǵy 21 myńnan astam azamatty Qarýly kúshterdiń, basqa da áskerler men áskerı quralymdardyń qataryna shaqyrý josparlanyp otyr. Onyń ishinde 11 myńnan astam adam Qarýly kúshterge, 7 myńnan astam adam ІІM Ulttyq ulanyna, 2 myńǵa jýyq adam UQK Shekara qyzmetine, 400-ge jýyq adam Tótenshe jaǵdaılar mınıstrligine, 300 adam Memlekettik kúzet qyzmetine shaqyrylady.
Keńes sońynda general-leıtenant Qanysh Ábýbákirov merzimdi áskerı qyzmetti uıymdastyrý jumystaryn ońtaılandyrý jáne sapaly júzege asyrý aıasynda jaýapty adamdarǵa birqatar naqty tapsyrmalar berip, Prezıdent Jarlyǵyn oryndaý maqsatynda barlyq memlekettik organdardy ózara tyǵyz is-qımyl men birlesken jaýapkershilikke shaqyrdy.
Al Astanadan kóktemde 1400 ulan áskerge shaqyrylady.
