Bıyl Kókshetaýda teńdesi joq sport kesheniniń qurylysy bastalady - quryltaı
BÝRABAI. KAZINFORM – Keıingi jyldary balalar sporty qarqyndy damı bastady. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.
- Sportty nasıhattaý, ony ásirese balalar men jasóspirimder arasynda dáripteý – ult saýlyǵynyń kepili. Sońǵy jyldary memleket qoldaýynyń nátıjesinde balalar sporty qarqyndy damı bastady. Biraq, bul – jetkiliksiz. Sondaı-aq bıznes ókilderi óskeleń urpaqty dene shynyqtyrýǵa jáne sportqa baýlý isine zor úles qosa alady dep oılaımyn, - dedi Qasym-Jomart Toqaev.
Prezıdenttiń aıtýynsha, Astanada shyǵarmashylyqqa arnalǵan úıirmelerdi de, jekelegen sport sektsııalaryn da ashyp, kópke úlgi bolyp otyrǵan jekemenshik Balalardy damytý ortalyǵy bar.
Bul tájirıbeni basqa aımaqtarda da qoldanǵan jón. Memleket barlyq aımaqta sport ınfraqurylymyn damytýǵa basa mán beredi. Bıyl Astanada Ulttyq sport ýnıversıtetiniń, Túrkistanda eskek esý sportyna arnalǵan kanaldyń, Qyzylordada fýtbol stadıonynyń, Jetisý oblysynda deneshynyqtyrý-saýyqtyrý kesheniniń, Oralda erekshe qajettiligi bar adamdarǵa arnalǵan sport kesheniniń qurylysy aıaqtalady.
- Bıyl Kókshetaýda kópfýnktsıonaldy sport kesheniniń qurylysy bastalady. Bul Qazaqstanda teńdesi joq ortalyq bolmaq. Osy jobany arnaýly memlekettik qordan, ıaǵnı zańsyz aktıvterdi qaıtarý esebinen qarjylandyrý kerek. Úkimetke osy máseleni pysyqtaýdy tapsyramyn. Úsh jyldyń ishinde eki trıllıon teńgeden astam zańsyz aktıvter elge qaıtaryldy. Bul qarjynyń aımaqtardaǵy ózekti ekonomıkalyq jáne áleýmettik máselelerdi sheshýge jumsalyp jatqany óte mańyzdy, - dedi Memleket basshysy.
Budan buryn habarlanǵandaı, Prezıdent Qazaqstanǵa úsh atom elektr stansasyn salý kerek ekenin aıtty.