Bıyl Qyzylordaǵa 750 mlrd teńgeden astam ınvestıtsııa tartylady

ASTANA. KAZINFORM — 2022-2024 jyldary Qyzylorda oblysynyń ekonomıkasyna 1,6 trln teńge ınvestıtsııa tartylǵan. Óńirdiń ınvestıtsııa tartý sharalary jóninde ákim Nurlybek Nálibaev aıtyp berdi. 

Ákimniń aıtýynsha, qolaıly ınvestıtsııalyq klımat qalyptasyp, jańa iri ınvestıtsııalyq jobalar júzege asyp jatyr. 2022-2024 jyldary oblys ekonomıkasyna 1 trln 600 mlrd teńgege jýyq ınvestıtsııa tartylǵan.

— Bıyl oblysymyzǵa 631 mlrd 400 mln teńge ınvestıtsııa tartý josparlanǵan. 11 aıdyń nátıjesinde 717 mlrd 900 mln teńge ınvestıtsııa tartylyp, jospar 13,7% artyǵymen oryndaldy. Jyl qorytyndysymen 750 mlrd teńgeden astam ınvestıtsııa tartylady, — dedi N. Nálibaev elordada Ortalyq kommýnıkatsııalar qyzmetinde.

Spıkerdiń aıtýynsha, 2021 jylmen salystyrǵanda ınvestıtsııa kólemi 233% artqan. Jeke ınvestıtsııanyń úlesi 70% quraǵan.

— Bıylǵy birinshi jartyjyldyqta tikeleı sheteldik ınvestıtsııa kólemi 173 mln dollar boldy. Jyl qorytyndysymen 280 mln dollar sheteldik ınvestıtsııa tartylady, — dedi oblys ákimi.

Aıta keteıik, bıyl Qyzylorda oblysynyń bıýdjeti 851 mlrd teńgeden asty. Bıýdjet qarajatyn ońtaılandyrý maqsatynda 2022 jyldan bastap áleýmettik salaǵa tereń taldaý júrgizilgen. Nátıjesinde 108 mlrd teńge qarjy únemdelgen.