Bıyl Qyzylorda oblysynda ınvestıtsııalyq 10 jańa jobanyń qurylysy bastalady

ASTANA. KAZINFORM - Qyzylorda oblysynda zamanaýı tehnologııalardy qoldana otyryp ınvestıtsııalyq 10 jańa jobany júzege asyrý bastalady. Bul týraly búgin óńir ákiminiń orynbasary Ardaq Zebeshev baıandady, dep habarlaıdy Úkimettiń baspasóz qyzmeti.

Jobalardy júzege asyrý oblysta 400 qosymsha jumys ornyn ashýǵa múmkindik beredi. Olar qytaı ınvestorlarynyń esebinen salynady.

Negizgi baǵyttardyń qataryna kirpish zaýytynyń qurylysy, qaǵaz, karton, aına óndiristerin iske qosý, sondaı-aq qýaty 90 MVt bolatyn úsh kún elektr stansasynyń qurylysy kiredi. Tamaq ónerkásibinde nan-toqash, makaron jáne kondıterlik ónimderdi óndirýdi, sondaı-aq túıe sútin, kúrish pen tuzdy óńdeýdi jolǵa qoıý josparlanyp otyr.

- Jobalar oblys ákiminiń QHR-dyń tórt óńirine jumys saparynyń qorytyndysy boıynsha qol qoıylǵan kelisimder negizinde júzege asyrylyp jatyr. Kelisimsharttardyń jalpy somasy 10,8 mlrd teńge boldy, - delingen habarlamada.

Osyǵan deıin Qyzylorda oblysynda sý resýrstaryn basqarý sharalary kúsheıtilgeni týraly jazdyq.