Bıyl qysta Pavlodar óńiriniń avtojoldarynda 10 jylytý pýnkti jumys isteıdi
PAVLODAR. KAZINFORM — Respýblıkalyq mańyzy bar joldardy kútip-ustaýǵa 2026-2027 kezeń úshin 3 mlrd teńge qarastyrylǵan. Qysta joldardy tazalaýǵa 115 arnaıy tehnıka men 307 jumysshy jumyldyrylady dep josparlanǵan.
Ertis-Baıan óńiriniń qysy yzǵarly. Boran men kóktaıǵaq saldarynan respýblıkalyq avtojoldar jıi jabylyp, kólikter keptelip turyp qalady. Sondaı sátte jol qyzmetteriniń daıyndyǵy asa mańyzdy.
«QazAvtoJol» UK» AQ Pavlodar oblystyq fılıalynyń málimetinshe, 2026–2027 jyldardaǵy qysqy kezeńde respýblıkalyq mańyzy bar avtomobıl joldaryn kútip-ustaýǵa memlekettik tapsyrys aıasynda 1,4 mlrd teńge, al aqyly ýchaskeler boıynsha 1,6 mlrd teńge qarastyrylǵan.
— Qysqa daıyndyq aıasynda jol jıekteri men eńisterdegi 1 336 shaqyrym aýmaqta shóp shabý, 3,14 shaqyrym jerde butalar men alasa aǵashtardy túp-tamyrymen qoparý jumystary atqarylyp jatyr. Avtojoldarda 37 481 sharshy metr shuńqyrlar jamaldy. Qysqy kezeńde joldardyń júris bóligin qardan tazalaý, kóktaıǵaqqa qarsy materıaldar sebý, qardan qorǵaıtyn orlar qazý jáne aǵash qalqandar ornatý kózdelgen, — dep habarlady Kazinform tilshisine «QazAvtoJol» kompanııasynan
Óńirdegi respýblıkalyq mańyzy bar avtokólik joldarynyń jalpy uzyndyǵy — 1 662,7 shaqyrym. Olardy kútip-ustaýmen «QAJservıs» JShS Pavlodar oblystyq fılıaly aınalysady. Onyń quramynda 8 jol paıdalaný basqarmasy men 6 jol paıdalaný pýnkti bar. Joldarǵa jalpy sany 115 arnaıy tehnıka men 307 jumysshy jumyldyrylady dep josparlanǵan.
— Respýblıkalyq joldar boıynda boıynda jalpy syıymdylyǵy 220 adamdy quraıtyn 10 jylytý pýnkti ornalasqan. Olardyń jumysyna «QAJservıs» JShS Pavlodar oblystyq fılıalynyń jol paıdalaný basqarmalary jaýapty. Aýa raıy kúrt nasharlap, jolda júrý qıyndaǵan jaǵdaıda mundaı pýnktter jolaýshylar men júrgizýshilerdiń qaýipsizdigin qamtamasyz etý úshin mańyzdy, — dep qosty kompanııadan.
Qysqy maýsymda joldardy óńdeý úshin 11 135 tekshe metr qum men 3 869 tonna tehnıkalyq tuz ázirlengen. Sonymen qatar jol boıyndaǵy jaryqtandyrý júıeleri tekserilip, anyqtalǵan aqaýlardy joıý jumystary júrgizilip jatyr.
Buǵan deıin Astana — Pavlodar tasjolynyń jóndelip jatqan bóligi qashan tolyq ashylatyny týraly jazǵanbyz.
