Bıyl Kentaýda jylý maýsymy erte bastalady
TÚRKІSTAN. KAZINFORM – Bıyl Kentaý qalasynyń turǵyndaryna qazan aıynyń 15-nen bastap jylý berile bastaıdy. Sebebi JEO-daǵy jóndeýden ótken qazandyqtar sol sátte iske qosylyp, tekserýden ótpek. Bul týraly JEO bas ınjeneri Muhtar Muhıtdınov málimdedi.
Búginde Kentaý qalasynda ornalasqan №5 jylý elektr ortalyǵyndaǵy tozyǵy jetken qazandyqtar qaıta qurý jumystarynan ótip jatyr. Atap aıtqanda, №8,11 qazandyqtardaǵy kúrdeli jóndeý jumystary 30 tamyzda aıaqtalǵan. Al №9, 10 qazandyqtar qyrkúıek aıynyń sońynda daıyn bolmaq. №7 jáne №12 qazandyqtardyń qaıta qurý jumystary qarasha aıynyń sońyna deıin jalǵasady dep kútilýde. Budan bólek, 2 qazandyq aǵymdaǵy jóndeý jumystarynan ótýde. №5 qazandyqty jóndeý bıýdjet esebinen júrgizilse, №6 qazandyqty jóndeý demeýshiler esebinen iske asady.
«Jylý maýsymyna 6 qazandyqpen kiremiz. Onyń 4-eýi iske qosylsa, ekeýi rezervte turady. Eger kún sýytyp jatsa, rezervtegi eki qazandyqta iske qosylady. Qazirgi tańda ortalyqta 150-ge jýyq adam jumys istep jatyr. Jylytý maýsymy bastalǵanda jumysshylar sany 350-den asatyn bolady. Odan bólek, merdiger kompanııada 200-den astam adam eńbek etýde. Jumysshylar kúndizgi jáne túngi aýysymǵa bólingen. ıAǵnı, qysqa daıyndyq kúni-túni toqtaýsyz júrgizilip jatyr», - dedi Muhtar Muhıtdınov.
Jylý energo ortalyqtaǵy qazandyqtardyń kúl ustaǵyshynan bastap, tóbesindegi murjasyna deıin aýysyp jatyr. Sondaı-aq, jańadan ornatylyp jatqan qazandyqtardy keleshekte gazǵa aýystyrýǵa múmkindikter qarastyrylǵan. ıAǵnı, aldaǵy ýaqytta ortalyq kómirden gazǵa kóshetin bolady.
«Mundaǵy jumystyń barshasy da avtomattandyrylyp jatyr. Buryńǵydaı kúrekpen kómir salyp otyratyn ýaqyttyń barshasy da artta qaldy. Sondyqtan bul baǵytta mamandardy arnaıy oqytyp jatyrmyz», - dedi bas ınjener.
Ortalyqtaǵy jumystardyń merziminde ári sapaly aıaqtalýy qatań baqylaýǵa alynǵan. Úkimet basshysynyń tapsyrmasyna sáıkes, memlekettik-jekeshelik áriptestigi tetigi arqyly 240 MVt jańa gazotýrbınalyq elektr stantsııasynyń qurylysy jobasyn iske asyrý úshin úshjaqty kelisimge qol qaıylyp, jol kartasy bekitilgen.
«Bizde eki týrbına bar. Osy ýaqytqa deıin tek bireýi ǵana jumys istep kelgen bolatyn. Onda óndirilgen elektr energııasy ishki qajettilikterge jumsalyp keldi. Bıyl ekinshi týrbına jóndeýden ótip jatyr. Bul JEO óndiretin energııa artady degen sóz. Ózimizden artylǵanyn satatyn bolamyz. Taǵy bir aıta keter jaıt, jyl saıyn jel tursa, ortalyqta jaryq sónip qalatyn. Apatty jaǵdaılarda tikeleı soǵan baılanysty týyndap keldi. Al, bıyl «Ońtústik jaryq» mekemesi elektr jelilerin rettep, jóndeýden ótkizdi. Endi jaryq óshse de, stantsııa isten shyqpaıdy dep otyrmyz», - dedi Muhtar Muhıtdınov.
Bıyl Kentaý qalasyndaǵy 6,6 shaqyrym magıstraldy jylý jelileri qaıta jańartyldy. Oǵan respýblıkalyq bıýdjetten 4,6 mlrd teńge qaraldy. Sonymen qatar 14,5 shaqyrym jylý jelilerin rekonstrýktsııalaý boıynsha joba ázirlendi.
Aıta keteıik, Kentaý qalasynyń jylý elektr ortalyǵynyń irgetasy 1934 jyly qalanyp, jabdyqtary 1952 jyly ornatylǵan. Sondaı-aq, negizgi materıaldyq jabdyqtarynyń 85 paıyzy tozǵan. Búginde JEO elektr energııasyn óndiredi jáne Kentaý qalasynyń turǵyndaryn jylýmen qamtamasyz etetin jalǵyz strategııalyq nysan bolyp tabylady. Qala boıynsha jylý tutynýshy 3255 nysan bolsa, jalpy 16 myńǵa jýyq abonent bar.
Ótken jylý maýsymynda Kentaýdaǵy jylý energo ortalyq 10 mınýtqa óship qalyp, saldarynan qala turǵyndary jylýsyz qaldy.
