Bıyl keminde 3,5 myń km kanal tsıfrlandyrylýy tıis - Sý resýrstary mınıstrliginiń alqa otyrysy
ASTANA. KAZINFORM - Sý resýrstary jáne ırrıgatsııa mınıstrliginde 2025 jylǵy jumys qorytyndylanyp, aldaǵy kezeńge arnalǵan negizgi josparlar aıqyndaldy.
Ótken jyldyń qorytyndysy boıynsha 53 ınfraqurylymdyq joba aıaqtaldy. Onyń ishinde 677 km ırrıgatsııalyq júıelerdi salý, rekonstrýktsııalaý jáne tazalaý, 4 sý qoımasyn qaıta jańǵyrtý, 15 toptyq sý qubyryn salý jáne jańǵyrtý, sondaı-aq 3 gıdrotehnıkalyq nysandy rekonstrýktsııalaý jumystary bar.
2025 jyly jańa Sý kodeksi kúshine endi. Sondaı-aq Qazaqstan men Ózbekstan úkimetteri arasynda transshekaralyq sý nysandaryn birlesip basqarý jáne utymdy paıdalaný jónindegi úkimetaralyq kelisimge qol qoıyldy.
Eýropalyq qaıta qurý jáne damý bankimen birlesken 46 joba aıaqtalyp, 502 km kanal rekonstrýktsııalandy. Islam damý bankiniń qoldaýymen júzege asyrylyp jatqan 9 joba aıasynda josparlanǵan 635 km kanaldyń shamamen 600 km-i qaıta jańǵyrtyldy.
Dúnıejúzilik bankpen birlesip Soltústik Aral teńiziniń klımattyq turaqtylyǵyn arttyrýǵa baǵyttalǵan joba ázirlendi. Bul joba Aral–Syrdarııa basseıniniń sý sharýashylyǵy ınfraqurylymyn jańǵyrtýdy kózdeıdi.
2026 jyly Islam damý bankiniń qoldaýymen eldiń ońtústiginde 103 kanaldy tsıfrlandyrý jumystary bastalady. Sonymen qatar sýarý sýyn berý boıynsha elektrondy kelisimsharttar jasasýǵa arnalǵan bıllıng júıesi pılottyq rejımde engizilýde.
«Memleket basshysy 2026 jyldy Tsıfrlandyrý jáne jasandy ıntellekt jyly dep jarııalady. Bul ekonomıkanyń negizgi salalarynda tsıfrlyq transformatsııany jedeldetý qajettigin taǵy da aıqyndaıdy. Osyǵan baılanysty josparlaýdan naqty iske kóshý, qarqyndy arttyrý, tabysty pılottyq sheshimderdi keńeıtý jáne bıyl Sý resýrstarynyń ulttyq aqparattyq júıesin paıdalanýǵa engizý qajet. Keminde 3,5 myń km kanal tsıfrlandyrylýy tıis, al 2028 jylǵa deıin barlyq kanaldar tolyq tsıfrlyq formatqa kóshirilýi kerek»,— dep tapsyrdy Qanat Bozymbaev.
Qazirgi tańda el boıynsha 277 eldi meken nemese 514 myń adam ortalyqtandyrylǵan sýmen qamtylǵan, onyń ishinde buryn aýyz sýǵa qol jetkize almaǵan 73 eldi meken bar.
Ótken jyly josparlanǵan 9 jobanyń ornyna 15 toptyq sý qubyryn rekonstrýktsııalaý jáne jańǵyrtý jobasy aıaqtaldy. 2026 jyly taǵy 12 jobany aıaqtaý kózdelip otyr, bul shamamen 540 myń halqy bar 142 aýyldy sapaly aýyz sýmen qamtamasyz etýge múmkindik beredi.
«Elde júrgizilip jatqan aýqymdy ózgerister aıasynda Konstıtýtsııanyń jańa redaktsııasy erekshe mańyzǵa ıe. Sý salasy qyzmetkerleri úshin bul ózgerister sý resýrstaryn basqarýdy jetildirýge, qorshaǵan ortany qorǵaýǵa jáne halyq pen ekonomıkany turaqty sýmen qamtamasyz etýge berik quqyqtyq negiz qalyptastyrady. Bizdiń negizgi strategııalyq mindetimiz – eldiń uzaq merzimdi sý qaýipsizdigin qamtamasyz etetin tıimdi, turaqty ári beıimdelgish sý resýrstaryn basqarý júıesin qalyptastyrý», — dep atap ótti Qanat Bozymbaev.
Alqa otyrysynyń qorytyndysy boıynsha vıtse-premer Mınıstrlik basshylyǵyna talqylaý barysynda kóterilgen barlyq máseleler men problemalyq baǵyttardy qatań baqylaýǵa alýdy tapsyrdy. Onyń ishinde zańsyz sý aınalymymen kúres, sý únemdeý tehnologııalaryn engizý jáne sý sharýashylyǵy ınfraqurylymyn jańǵyrtý sharalary bar.
Osyǵan deıin Qanat Bozymbaev Sý resýrstary mınıstrliginiń aldyna sýdyń «qara naryǵyn» joıý is-sharalary josparyn ázirleý mindetin qoıǵan bolatyn.