Bıyl keden zańnamasyn buzǵandarǵa 534 ákimshilik is qozǵalǵan

ASTANA. KAZINFORM — Sońǵy 11 aıda elimizde 937 kedendik tekseris júrgizilgen. Al solardyń 83%-ynda zańbuzýshylyq anyqtalypty.

Bul týraly QR QM MKK Taýarlar shyǵarylǵannan keıingi kedendik baqylaý basqarmasynyń basshysy habarlady.

— Bıylǵy 11 aıdyń qorytyndysy boıynsha 937 kedendik tekserý júrgizilip, nátıjesinde 32 mlrd teńge qosymsha salyq pen baj salyǵy esepteldi, onyń ishinde 78%-y, shamamen 25 mlrd teńge, bıýdjetke naqty túsim retinde óndirildi. Zań buzýshylyqtar kedendik tekseristerdiń 83%-ynda anyqtaldy, ıaǵnı 778 tekserý nátıjesinde keden zańnamasyn buzý faktileri tirkeldi. Ótken jylmen salystyrǵanda qosymsha esepteý somasy 176%-ǵa, al bıýdjetke óndirip alý somasy 267%-ǵa ósti, — deıdi Ádilet Arashapov.

Basqarma basshysy salyq tóleýden jaltarǵandar zańmen jazalanatynyn eskertti.

— Keden salasynda zań buzǵany úshin 534 ákimshilik is qozǵalyp, 442 mln teńge kóleminde aıyppuldar bıýdjetke óndirildi. Bul aıyppuldar QR Ákimshilik quqyq buzýshylyq týraly kodekstiń 551-babyna sáıkes salynady jáne deklaratsııalarda kórsetilgen málimetterdiń durys bolmaýynan týyndaıdy. Eger kedendik tólemder men salyqtardan jaltarý somasy 10 000 AEK-ten asatyn bolsa, onda QR Qylmystyq kodeksiniń 236-babyna sáıkes qylmystyq jaýapkershilikke tartylady, — deıdi Ádilet Janatuly.

Aıta keteıik, keden qyzmetkerlerine kólikti toqtatyp, tekserý quqyǵy berilmek.