Bıyl «Qazsýshardyń» tehnıka parki alty jańa kememen tolyǵady
ASTANA. KAZINFORM – Sý resýrstary jáne ırrıgatsııa mınıstrligine qarasty «Qazsýshar» RMK jyl sońyna deıin alty jańa jersnarıad satyp alýdy josparlap otyr. Bul – sý nysandaryn laı men shógindilerden tazartýǵa arnalǵan arnaıy kemeler.
Jersnarıadtardy Túrkistan oblysyndaǵy Shardara sý qoımasy men «Mashkanaldy» (Mashınalyq ádispen sý kóterý kanaly), Jambyl oblysyndaǵy Tasótkel sý qoımasyn tazartýǵa, sondaı-aq Aqmola oblysyndaǵy Astana sý qoımasyn tazartý jumystaryna paıdalaný josparlanyp otyr.
Aıta keteıik, byltyr «Qazsýshardyń» Aqmola fılıalyna eki jersnarıad berilgen bolatyn. Sý resýrstary jáne ırrıgatsııa mınıstrli málimetinshe, qazir olar Astana sý qoımasyn sońǵy 55 jylda alǵash ret tazartý jumystaryna paıdalanylyp jatyr. Sonyń nátıjesinde nysannyń syıymdylyǵy 47 mln tekshe metrge ulǵaıyp, elorda turǵyndaryn sýmen qamtý júıesin jaqsartýǵa múmkindik beredi.
— Jersnarıadtar sý sharýashylyǵy nysandaryn tazartý jumystarynyń tıimdiligin arttyrady. Bul kanaldardyń sý ótkizý qýatyn jaqsartyp, sý qoımalarynda kóbirek sý jınaýǵa jol ashady. Mundaı jumystar aldaǵy ýaqytta Qazaqstannyń barlyq óńirindegi nysandarda júrgiziledi, — dedi «Qazsýshar» RMK bas dırektorynyń mindetin atqarýshy Anýar Óskenbaev.
Aıta keteıik, Qyzylorda oblysyndaǵy sý salasynyń ókilderi Syrdarııa ózenindegi sý deńgeıi jáne kóktemgi sý tasqynyna daıyndyq týraly aıtyp berdi.
