Bıyl Qazaqstannyń keleshegine tikeleı yqpal etetin asa mańyzdy jyl bolady - Prezıdent
QYZYLORDA. KAZINFORM – Bıyl Qazaqstannyń keleshegine tikeleı yqpal etetin asa mańyzdy jyl bolady. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.
- Bıyl Qazaqstannyń keleshegine tikeleı yqpal etetin asa mańyzdy jyl bolady. Men muny jaqynda «Turkistan» gazetine bergen suhbatymda atap óttim. Elimiz aýqymdy saıası jańǵyrýdyń jańa kezeńine qadam basqaly tur. Aldaǵy parlamenttik reforma osy ózgeristerdiń ózegi bolatyny anyq. Joldaýymda bir palataly Parlament qurý týraly bastama kótergenimdi bilesizder. Bul asa mańyzdy másele qoǵamda keńinen talqylandy, - dedi Prezıdent.
Memleket basshysy byltyr 8 qazanda Parlamenttik reforma jónindegi jumys tobyn qurý týraly ókimge qol qoıǵanyn eske saldy. Onyń quramyna belgili zańgerler, sarapshylar, saıası partııalar men qoǵamdyq uıymdardyń ókilderi kirdi.
- Eldik iske beıjaı qaramaıtyn basqa da azamattarymyzdyń bul talqylaýǵa qatysýy óte mańyzdy. Sondyqtan e-Otinish platformasy men Egov portalynda «Parlamenttik reforma» degen arnaıy bólim ashyldy. Azamattarymyz osy máselege qatysty ózderiniń oı-pikirin bildirip, usynystaryn joldady. Jumys toby kelip túsken usynystardy jınaqtap, zerdelep, parlamenttik reformany barlyq jaǵynan qarastyrdy, óte mańyzdy jumys atqardy. Bul baǵyttaǵy sharýanyń bárin ózim tikeleı baqylaýda ustadym, - dedi Qasym-Jomart Toqaev.
Prezıdent byltyr qazan aıynyń ortasynda Jumys tobynyń alǵashqy otyrysyn ótkizgenin aıtty.
- Jeltoqsannyń 2-si jáne 29-y kúnderi taǵy eki jıyn boldy. Jańa jyldan beri Jumys tobynyń músheleri 3 ret bas qosty. Sońǵy otyrys kúni keshe ǵana Quryltaı qarsańynda ótti. Bir sózben, konstıtýtsııalyq reforma týraly qyzý talqylaýlar jarty jylǵa jýyq ýaqyt boıy júrip jatyr, - dedi Memleket basshysy.
Aıta keteıik, Prezıdent halyq qoldasa, Qazaqstannyń memlekettik qurylysynyń jańa kezeńi bastalatynyn málimdedi.