Bıyl qazaqstandyqtardyń ortasha aılyǵy 322 myń teńgege jetti
Osy jyly jaldamaly jumysshylardyń ortasha jalaqysy - 322 myń 845 teńge. Onyń ishinde erlerdiń eńbekaqysy - 361 myń 481 teńge, áıelderde 285 myń 744 teńge, dep habarlaıdy Kazinform ulttyq statıstıka bıýrosyna silteme jasap.
Qazaqstanda barlyǵy 3 mln 437 myń jaldamaly jumysshy bar.
Eń joǵary jalaqy Atyraý oblysynda — 530 myń teńgeden astam.
Ekinshi orynda Mańǵystaý oblysy — 469 myń teńge, úshinshi orynda — Ulytaý oblysy (445 myń teńge.
Al tómengi jalaqy SQO-da — 227 myń teńge.
Resmı derekterge sáıkes, jalpy ekonomıkada bıyl bilim deńgeıi boıynsha qyzmetshilerdiń ortasha jalaqysy kelesideı: orta bilim — 230 myń 841 teńge, joǵary bilim — 398 myń 214 teńge, joǵary oqý ornynan keıingi bilim — 505 170 teńge.
«Joǵary bilimniń bolýy orta eseppen jalaqyny 72,5%, al joǵary oqý ornynan keıingi bilim ony taǵy 27% arttyrady. Alaıda, ekonomıkadaǵy jumysshylardyń 46,1% ǵana orta bilimi bary alańdatady», - dep túsindirdi ekonomıst Ǵalymjan Aıtqazın óziniń Telegram kanalynda.
Onyń esebinshe, Qazaqstan ekonomıkasynda bilim deńgeıi boıynsha erlerdiń ortasha jalaqysy áıelderge qaraǵanda 39% joǵary.
«Bálkim, genderlik jalaqynyń mundaı aıyrmashylyǵy bala kútimimen áıelderdiń jumys istegen saǵattarynyń sanyna baılanysty bolar. Óıtkeni, jalaqy mólsherlemesi boıynsha mundaı aıyrmashylyqtyń bolýy ekitalaı», - dep qorytyndylady sarapshy.
