Bıyl qazaqstandyqtar ushaq bortynda ınternetti paıdalana bastaıdy
ASTANA. KAZINFORM — Qazaqstan aýmaǵynda Starlink salǵan gateway-stantsııalar arqyly spýtnıktik ınternet kórshiles elderge de qoljetimdi bolady. Sondaı-aq poıyz ben ushaq jolaýshylaryna da ınternet qoljetimdi bolady. Bul týraly Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.
Prezıdent Qazaqstan halqyna Joldaýyna úsh jylda tolyqqandy tsıfrlyq el qurý boıynsha strategııalyq mindet qoıǵan edi. Sondaı-aq 2026 jyl Jasandy ıntellekt jyly dep jarııalandy. Osyǵan oraı, Tsıfrlyq kodeks jəne «Kıberqaýipsizdik týraly» zań qabyldandy. Bıyl da tsıfrlyq ekonomıkany nyǵaıtýǵa baǵyttalǵan birqatar zańnamalyq bastamalar ázirlenbek.
— Tsıfrlyq ekonomıkanyń tıimdiligi baılanys ınfraqurylymynyń sapasyna tikeleı baılanysty. Byltyr osy baǵytta barlyq negizgi joba iske qosyldy. Jumystardyń basym bóligi bıyl aıaqtalady. Atap aıtqanda, qosymsha 1900 aýyl talshyqty-optıkalyq baılanysqa qol jetkizedi. Kelesi jyly mundaı aýyldardyń úlesi 90 paıyzdan asady. Barlyq respýblıkalyq mańyzy bar avtomobıl joldary baılanys ınfraqurylymymen qamtamasyz etiledi, — dedi J. Mádıev Úkimettiń keńeıtilgen otyrysynda.
Prezıdent tapsyrmasyna sáıkes, byltyr jeltoqsan aıynda barlyq ótkizý pýnkti ınternetpen qamtylǵan.
— Bıyl «Qazaqstan temir joly» jolaýshylar tasymalynyń barlyq negizgi baǵytynda ınternet qoljetimdi bolady. Alǵash ret azamattar otandyq áýe tasymaldaýshysy bortynda ınternetti paıdalana bastaıdy, — dedi sala mınıstri.
Azamattardyń qajettilikterin óteýmen qatar, bul tsıfrlyq ınfraqurylym Qazaqstannyń aımaqtyq tsıfrlyq baılanys haby retindegi kóshbasshylyq rólin kúsheıtýge múmkindik beredi.
— Qazaqstan aýmaǵynda Starlink salǵan gateway-stantsııalar arqyly spýtnıktik ınternet kórshiles elderge de qoljetimdi bolady. Mysaly, Tájikstanǵa trafık bıyl beriledi. Kelesi kezekte — Mońǵolııa men Qyrǵyzstan tur. Al Transkaspıı talshyqty-optıkalyq baılanys jelisi boıynsha Ózbekstan qazirdiń ózinde offteık-kelisimshart usynyp otyr, — dedi Jaslan Mádıev.
Buǵan deıin Memleket basshysy KazLLM tildik mashınasyn iske qosý men Aitu messendjerin qoldanysqa engizý jumystaryn synaǵan edi.