Bıyl qazaqstandyqtar aýyl sharýashylyǵy jármeńkelerinen 7,9 myń tonna ónim satyp alǵan

ASTANA. KAZINFORM – Ótken demalys kúnderi elimizdiń barlyq óńirinde respýblıkalyq aýylsharýashylyq jármeńkeleri uıymdastyryldy, dep habarlaıdy Saýda mınıstrligi.

Іs-sharaǵa 1300-den astam aýyl sharýashylyǵy taýaryn óndirýshi men kásipker qatysyp, jármeńkelerge kelgenderdiń jalpy sany 170 myńǵa jýyqtady. Negizgi suranys et ónimderine baǵyttaldy. Barlyǵy 300 tonnadan astam et satyldy. Sıyr eti baǵasy kelisine 2 500–3 500 teńge aralyǵynda boldy.

- Astanada jármeńke barysynda 20 tonna sıyr eti 3 000–3 500 teńgeden satyldy. Sonymen qatar 1 tonna qus eti (1 500 tg/kg), 1 tonna un (280 tg/kg), 0,5 tonna makaron (300 tg/kg), 0,5 tonna kúrish (400 tg/kg) jáne 0,2 tonna qaraqumyq (250 tg/kg) saýdalandy. Kúnbaǵys maıy 900 teńgeden 0,1 tonna, al sary maı 4 000–4 200 teńgeden 0,2 tonna kóleminde satyldy, - delingen aqparatta.

Almaty qalasynyń turǵyndary shamamen 20 tonna et ónimderin satyp aldy. Shymkentte jármeńkege 258-ge jýyq kásipker qatysty. Olardyń qatarynda Túrkistan oblysynyń et óndirýshileri, kóterme jetkizýshiler jáne sharýa qojalyqtary boldy. Turǵyndar áleýmettik mańyzy bar sıyr eti baǵasynyń qoljetimdi ekendigin atap ótti. Sonymen birge barlyq sanattaǵy sıyr etine, sonyń ishinde jumsaq bólikterine de baǵany tómendetý jóninde usynystar bildirildi. Basqa áleýmettik taýarlar boıynsha baǵalar naryqtyq jáne bólshek saýda jelilerine qaraǵanda áldeqaıda qolaıly dep baǵalandy.

Respýblıka boıynsha ótken jármeńkelerde et ónimderimen qatar kókónister, jemis-jıdek, jarma túrleri jáne sút ónimderi usynyldy. Eń qoljetimdi taýarlar kartop, sábiz jáne pııaz boldy. Kartoptyń ortasha baǵasy – 200 teńge, sábiz – 250 teńge, pııaz – 220 teńge. Kelýshiler jármeńkeniń yńǵaılylyǵyn, baǵany salystyrý múmkindigin jáne sapaly ónimdi tómendetilgen baǵamen alý artyqshylyǵyn atap ótti.

Batys Qazaqstan oblysynda aýylsharýashylyq jármeńkeleri eki orynda ótti. Óńirdiń taýar óndirýshileri usynǵan ónim qatarynda kondıterlik jáne shujyq ónimderi, kúnbaǵys maıy, sút taǵamdary, jumyrtqa, bal jáne basqa da taýarlar boldy. Sharýa qojalyqtary kartop, qus eti, úırek, qaz, túıetaýyq, sondaı-aq sıyr, jylqy jáne shoshqa etin saýdalady. Barlyq ónim joǵary sapasymen jáne qoljetimdi baǵasymen erekshelendi. Máselen, sıyr jáne jylqy eti 2 700–2 800 teńgeden, kartop 130 teńgeden, pııaz ben qyryqqabat 100 teńgeden, S1 sanatyndaǵy jumyrtqa 52 teńgeden usynyldy.

Óskemen qalasynda senbi kúni bes aýylsharýashylyq jármeńkesi uıymdastyryldy. Marqakól aýdanynan kelgen fermerler 2 tonna sıyr etin 3 000 teńgeden, 3 tonna jylqy etin 2 800 teńgeden jáne 3 tonna qoı etin 3 200 teńgeden jetkizdi. Budan bólek, bal, sút ónimderi, irimshik, sary maı jáne basqa da taýarlar da tıimdi baǵamen satyldy. Qalanyń ózge jármeńkelerinde de túrli et ónimderi, sút taǵamdary, bal, kókónis, jemis-jıdek jáne tabıǵı ónimder keńinen usynyldy. Bir kún ishinde shamamen 5 tonna sıyr eti, 4 tonna jylqy eti, 5 tonna qoı eti, 10 tonna kókónis, 2 tonna qus eti jáne birneshe tonna basqa da aýylsharýashylyq ónimderi satyldy.

Jármeńkelerdegi baǵalar naryqtyq deńgeıden tómen boldy: kartop – 200 teńge, sábiz – 150 teńge, qyryqqabat – 140 teńge.

Jyl basynan beri elimizde 504 aýylsharýashylyq jármeńkesi ótip, onda jalpy kólemi 7,9 myń tonna ónim 5,3 mlrd teńgege saýdalandy.

Aıta keteıik, elimizdiń aýyl sharýashylyǵy ónimderi 15-ten asa elge eksporttalady.