Bıyl qazaqstandyq qajylarǵa qandaı talaptar qoıylady

ASTANA. KAZINFORM – Astanada Qazaqstan musylmandary dinı basqarmasynyń uıymdastyrýymen 2026 jylǵy qajylyqty ótkizýge arnalǵan keńeıtilgen onlaın jınalys ótti.

Jıyn bas múftı Naýryzbaı qajy Taǵanulynyń tapsyrmasymen uıymdastyrylyp, oǵan Qazaqstan Qajylyq mıssııasynyń ókilderi, QMDB qyzmetkerleri, QR Din isteri komıtetiniń ókili jáne qajylyq saparyn uıymdastyrýǵa ruqsat alǵan 14 týroperatordyń basshylary qatysty.

– Bıylǵy qajylyqtyń basty maqsaty – otandastarymyz úshin rýhanı mazmundy ári uıymdastyrý jaǵynan minsiz sapardy qamtamasyz etý. Qajylardyń qaýipsizdigi men qolaılylyǵy – negizgi basymdyq, – dedi Qajylyq mıssııasynyń tóraǵasy Kenjetaı Baıkemeluly.

Jıynda bıylǵy qajylyq maýsymyna qatysty birqatar talaptar túsindirildi.

Atap aıtqanda, árbir qajy Qazaqstan aýmaǵynan tek resmı týrkod arqyly shyǵýy tıis. Bul talap zańsyz qajylyq saparlarynyń aldyn alýǵa baǵyttalǵan. Sondaı-aq Qazaqstan kvotasy arqyly ózge el azamattaryn qajylyqqa aparý faktilerine jol berilmeıtini eskertildi.

Qajylyq qyzmetin tek memlekettik lıtsenzııasy jáne QMDB ruqsaty bar týroperatorlar ǵana júzege asyrady. Bul sharalar qajylardyń qulshylyqty qaýipsiz ári rettelgen jaǵdaıda oryndaýyna múmkindik beredi.

Jıyn barysynda qajylarǵa arnalǵan «Qajy Guide» mobıldi qosymshasynyń jumysy tanystyryldy. Qosymsha sapar kezinde aqparattyq jáne tehnıkalyq qoldaý kórsetýdi jeńildetýge baǵyttalǵan.

Sonymen qatar qajylardyń mindetti vaktsınatsııadan ótýi jáne densaýlyq saqtaý talaptaryn saqtaý máseleleri de erekshe baqylaýǵa alynatyny aıtyldy.

Kezdesý qorytyndysynda týroperatorlardyń usynystary tyńdalyp, olardy uıymdastyrý jumystaryna engizý qarastyryldy.

Aıta keteıik, Qazaqstanda qajylyq saparyn uıymdastyrý júıesi jyl saıyn jetildirilip, qaýipsizdik pen qyzmet sapasyn arttyrýǵa basymdyq berilip keledi.

Al Saýd Arabııasy qajylyq qarsańynda Mekkege kirýge qatysty jańa talaptardy jarııalady.