Bıyl qazaqstandyq balalarǵa Ulttyq qordan 900 mln dollardan astam qarajat aýdaryldy
ASTANA. KAZINFORM - Bul týraly Ortalyq kommýnıkatsııalar qyzmeti alańynda «Balalardyń ál-aýqaty men qaýipsizdigi: memlekettik qoldaý jáne ortaq qundylyqtar» taqyrybynda ótken jıynda QR Oqý-aǵartý vıtse-mınıstri Shynar Aqparova málim etti.
– Qazaqstanda balalar sany turaqty túrde ósip keledi. Qazirgi tańda elimizde 6 mln 900 myńnan astam bala turady, sońǵy on jyldyń ishinde bul kórsetkish shamamen 1,5 mıllıonǵa ósken. «Ulttyq qor – balalarǵa» baǵdarlamasy aıasynda 18 jasqa tolmaǵan balalardyń derbes shottaryna qordyń 50% ınvestıtsııalyq tabysy úzdiksiz túsip jatyr,-dedi ol.
Onyń sózinshe, osyndaı demografııalyq ósimdi eskere otyryp, memleket tarapynan balalardy qarjylaı qoldaý sharalary da aıtarlyqtaı kúsheıtilgen. Máselen, baǵdarlama bastalǵan 2024 jyly ár balaǵa 100,52 AQSh dollarynan berilse, 2026 jyly bul soma 130,71 AQSh dollaryna deıin artqan.
– Osylaısha, memleket bıyl qazaqstandyq balalardyń derbes shottaryna ınvestıtsııalyq tabys retinde jalpy somasy 900 mln AQSh dollarynan astam aýqymdy qarajatty aýdardy,-dedi vıtse-mınıstr.
Mınıstrlik ókilderiniń málimdeýinshe, Ulttyq qor tólemderimen qatar qazirgi tańda «Keleshek» erikti jınaqtaý jobasy da qatar iske asyrylyp jatyr. Dóńgelek ústelde naqtylanǵandaı, memleket usynyp otyrǵan bul qos tetik eldegi mıllıondaǵan balaǵa kámelettik jasqa tolǵanda sapaly bilim alýdy qamtamasyz etýge, laıyqty mamandyq meńgerýge nemese turǵyn úı máselesin derbes sheshýge tikeleı múmkindik bermek.
Buǵan deıin Almatyda Balalardy qorǵaý kúnine oraı tegin medıtsınalyq tekserýden ótýge bolatyny jaıly jazdyq.
