Bıyl Qazaqstandaǵy kýrorttarda demalý quny qansha
ASTANA. KAZINFORM - Qazaqstandyqtar jazdyń aptap ystyǵynda teńiz, kól men taýǵa barýdy josparlaıdy. Kazinform agenttiginiń tilshisi tanymal ishki týrıstik baǵyttar men demalysqa qansha qarjy qajet ekenin bildi.
Jazǵy demalys kezinde baǵaǵa tek jatyn oryn ǵana emes, jol, tamaqtaný, maýsymdyq suranys pen kóńil kóterý oryndary jáne qosymsha shyǵyndar áser etedi. Ár baǵyttyń óz ereksheligi bar, soǵan sáıkes shyǵyn da ózgerip otyrady. Birinde erte kelisim jasasa, ekinshisinde tamaqtaný tártibi mańyzdy. Taǵy birinde shyǵyndy tek sol jerde esepteýge bolady. Biz tanymal kýrorttardy tańdap, qajetti qarjyny eseptep shyqtyq.
Balqash kýrorttyq aımaǵy
Balqash elimizdegi qoljetimdi baǵyttardyń biri bolyp qala bermek. Munda úıdi jaldaý quny bir adamǵa táýligin 3 500 – 5 500 teńge bolyp tur. ıAǵnı shaǵyn ǵana jatyn orny, ortaq as úıi bar. Tamaqty árkimniń ózi isteýine týra keledi. Al eger kondıtsıoner men jýyný bólmesi bar jaıly oryndy tańdasa, ár adamǵa 11 000 – 16 000 teńge esepteledi. Keı oryndarda keshendi asty qosa beredi. Demek Balqashta úsh kún tynyqqan adam shamamen 50 000 – 60 000 teńge jumsaıdy. Qaıyqpen serýendeý, shezlongti jáne túrli qajetti dúnıelerdi jalǵa alý, satyp alýǵa qosymsha aqsha kerek. Tamyz aıyna taman suranys artady. Sondyqtan erte qamdanyp, barar oryndy kúni buryn saılap alǵan durys.
Alakól kýrorttyq aımaǵy
Alakól negizinen otbasylyq demalys orny bolyp sanalady. Munda kóbi bala-shaǵasymen keledi jáne úsh mezgil tamaqtanǵandy jón kóredi. Eń arzan usynys munda táýligine ár adamǵa - 12 000 – 15 000 teńge. Týrıst qarapaıym ǵana bólmege ornalasady jáne ashanadan tamaq ishedi. Al jaıly oryn, basseın, balalardyń oıyn alańy men kóńil kóterý orny bar týrıstik bazalar táýligine 25 000 – 50 000 teńge alady.
Otbasylyq joldamany birneshe aı buryn alýǵa bolady. Aldyn ala qansha balany ertip aparatynyńyzdy josparlańyz. Keıde balalarǵa jeńildik jasaıdy, keıbiri tegin qabyldaıdy. Jol men az-kem kóńil kóterý baǵytyn tańdasańyz, Alakólge úsh kúnge 150 000 – 190 000 teńge kerek. Eń qymbat maýsym – shilde.
Şýchınsk-Býrabaı kýrorttyq aımaǵy
Býrabaıdan baǵasy tómen jatyn oryn men qymbat qonaqúı de tabylady. Sondyqtan baǵa adamnyń óz tańdaýyna qaraı ózgerip otyrady. Bólme jáne shaǵyn úıge táýligine 10 000 – 12 000 teńge alady. Eger osy usynysty tańdasańyz, kól men negizgi týrıstik orynǵa deıingi qashyqtyqty bilip alǵan jón. Keıde demalys aımaǵyna jetý úshin 15-20 mınýt qajet bolady.
Tamaqtaný men shıpajaıda tynyǵý baǵasy kem degende adam basyna 22 500 teńge bolady. Ortasha deńgeıdegi qonaqúıde tańǵa as, tańǵy jáne túski as ta usynady. Baǵasy – 15 000 – 40 000 teńge. Dámhana men meıramhanalarda tamaqtaný qosymsha shyǵyndy qajet etedi. Eki adamǵa orta eseppen 10 000 teńge bolady. Bul somaǵa ishimdik aqysy qosylmaǵan.
Demek, Býrabaıdaǵy úsh kúndik demalysqa shamamen 150 000 – 220 000 teńge kerek. Oǵan ekologııalyq jarna, aqyly jaǵajaı, katamaran, ekskýrsııa men taksı qyzmetin qosý kerek.
Mańǵystaý kýrorttyq aımaǵy
Aqtaý teńizge shyǵar negizgi baǵyt bolyp qala bermek. Munda jaǵajaı mańyndaǵy demalys oryndaryn tańdaýǵa, sonymen birge qaladan páter jaldaýǵa bolady. Tıimdisi – páterdi jalǵa alý. Munda bir bólmeli páter baǵasy táýligine 10 000 – 13 000 teńge bolady. Baǵa páter ornalasqan aýdanǵa, jóndeý jumystaryna baılanysty ózgeredi.
Qonaqúıler men teńiz jaǵasyndaǵy demalys bazasy qymbat. Táýligine – 34 000 – 40 000 teńge jáne odan joǵary. Baǵa maýsym aıynan bastap ósedi. Aqtaýdaǵy úsh kúndik demalys bir adamǵa shamamen 180 000 – 230 000 teńge bolady. Baǵaǵa áýe bıletteri de áser etedi. Keıbiri alys jaqqa poıyzben barady. Adamdar jergilikti sýpermarketten azyq-túlik alyp, tamaq isteıdi. Sóıtip aqsha únemdeı alady. Munda keıbir jaǵajaıda sý asty tas bolyp keledi. Aıaq kıim de soǵan yńǵaıly bolýy tıis.
Almatydaǵy taý klasteri
Almaty taýlary da jazda suranysqa ıe. Alataý shatqaly men etegindegi glempıng, A-freım úlgisindegi jáne kıiz úılerge qazir kópshilik qyzyǵady.
Eń arzany hostel men kempıngtegi bólmeler. Bir túnep shyǵý ár adamǵa 6 000 – 7 500 teńge. Tabıǵaty tamasha aımaqta ornalasqan, taý kórinisi keremet demalys oryndarynyń baǵasy 35 000 – 50 000 teńge. Demalys kúnderi baǵa ósedi.
Taý ishinde tamaqtaný baǵasyna logıstıka áser etip tur. Eki adamǵa arnalǵan túski as baǵasy shamamen 12 000 – 15 000 teńge.
Almatynyń taý arasyndaǵy úsh kúndik demalys baǵasy 250 000 teńge jáne odan joǵary bolady. Kólik, aspaly jol, eko-taksı men ulttyq park jarnasyn da qarastyrǵan jón. Eger únemdegińiz kelse, Almatyǵa aıaldap, taýǵa bir kúndi ǵana arnańyz.
Aıta keteıik, Qazaqstan týrızmin nasıhattaýǵa halyqaralyq blogerler tartyldy. Sonymen birge memleket týrıstik ınfraqurylymdy damytýǵa basymdyq berip, ulttyq parkterdegi jol, ınjenerlik jeli jáne servıstik nysandar máselesin sheshýge kiristi.
