Bıyl Qazaqstanda qaı kólik brendterine suranys joǵary
ASTANA. KAZINFORM — Shildede jańa avtokólik saýdasy 5,9 paıyzǵa ósti. Bul rette sol kezeńde top-5 qataryna Hyundai, Chevrolet, Kia, Changan jáne Chery endi.
«Qazaqstannyń Avtokólik Odaǵy» (QAO) dereginshe, 2026 jylǵy shildede resmı dılerler 21 371 jeńil jáne kommertsııalyq avtokólik satqan, bul byltyrǵy shildedegi nátıjeden (20 179) 5,9 paıyzǵa kóp. Qańtar-shilde qorytyndysy boıynsha 127 260 jańa avtokólik ótip, 2025 jylǵy sáıkes kezeńdegiden 1,7%-ǵa (125 132) joǵary boldy.
- Qazaqstannyń naryǵy jańa avtokólikter saýdasynyń joǵary deńgeıin saqtap tur. Qazir básekelestik orta qanshalyqty tez ósip jatqany baıqalyp tur. Osy oraıda elde jasalatyn modelder ornyn nyǵaıtyp, tańdaý múmkindigi artyp keledi. Al satyp alýshylar avtokóliktiń qunyn ǵana emes, tehnologııalardy, alý sharttary men satyp alǵan soń qyzmet kórsetý sapasyn da muqııat baǵalaıdy, - dedi QAO prezıdenti Anar Maqasheva.
Jazda qaı kólik túri ótimdi boldy?
Atap aıtqanda, 2026 jylǵy shildede Hyundai dılerleri 3 712 avtokólik satyp, byltyrǵy shildedegi nátıjesin qaıtalady (+0,4%). Ekinshi orynǵa 2 855 avtokólik nátıjesimen Chevrolet jaıǵasty (-29,5%). Úshinshi orynda Kia tur, onyń saýdasy 14,8% ósip, 2 492 avtokólikke jetken. Changan-nyń kórsetkishi Kia-ǵa jaqyn – 2 456 avtokólik satyldy. Brend saýdasy byltyrǵy shildemen salystyrǵanda birden 171,7% ósken. Alǵashqy bestikti Chery túıindedi, marka 1 543 avtokólik satyp, 2025 jylǵy kórsetkishten 35,6% joǵary nátıje kórsetti.
Sonymen qatar alǵashqy ondyqqa Jetour (1 129 kólik; -14,5%), Toyota (1 019; +8,1%), JAC (994; -10,5%), Geely (868; +73,3%) jáne Haval (864 kólik; -16,6%) endi.
Modelder arasynda shildede Chevrolet Cobalt kósh basyna shyqty – 2 682 avtokólik. Ekinshi orynǵa Hyundai Tucson (1 851 kólik) turaqtady, al 1 070 avtokólik satylǵan Changan CS35 MAX alǵash ret eń kóp ótken úsh model qataryna endi.
Budan bólek, shildede Kia Cerato eń tanymal avtokólikter arasyna qaıta qosyldy, ıaǵnı dılerler 1 031 avtokólik satyp, bul modeldiń birden tórtinshi orynǵa kóterilýine múmkindik berdi. Úzdik bestikti Kia Sportage túıindedi – 820 avtokólik.
Jalpy, jeti aı qorytyndysy boıynsha 20 959 avtokólik nátıjesimen Hyundai birinshi oryn aldy (-24,7%). Chevrolet ekinshi – 20 441 avtokólik, bul 2025 qańtar-shildemen salystyrǵanda +17,8% joǵary kórsetkish.
Úshinshi orynda Kia – 14 824 avtokólik (+9,9%). Tórtinshi satyǵa saýdasyn eki ese ulǵaıtyp, 11 927 avtokólikke deıin jetkizgen Changan kóterildi (+101,8%).
Kóshbasshylar bestigin Chery túıindedi – 9 686 avtokólik (+14,6%). Sodan keıin tizimde Haval (7 590 kólik; +11,2%), Jetour (6 903; -19,4%), JAC (5 739; -1,7%), Toyota (5 016; -8,8%) jáne Geely (3 794; -34,3%) tur.
Bıyl elde 190 myń avtokólik shyǵarylady
Ónerkásip jáne qurylys mınıstri Ersaıyn Naǵaspaevtyń aıtýynsha, avtokólik óndirisi salasy qarqyndy damyp kele jatyr.
Atap aıtqanda, keıingi 5 jylda salaǵa 457 mlrd teńgege jýyq ınvestıtsııa tartyldy. Byltyr 171 myńnan astam avtokólik shyǵarylyp, óndiris kólemi 18%-ǵa artty.
- Bul oń dınamıka bıyl da saqtalada. Osy jyldyń 6 aıynda 94 400 kólik shyǵaryldy, bul ótken jylmen salystyrǵanda 35%-ǵa joǵary. Bıylǵy jospar — óndiris kólemin 11%-ǵa arttyryp, 190 myń kólik shyǵarý. Jalpy bıyl avtomobıl shyǵarý salasy 131,1%-ǵa ósti, — dedi mınıstr.
Ersaıyn Naǵaspaevtyń málimdeýinshe, otandyq avtomobıl ónerkásibin odan ári damytý jáne onyń básekege qabilettiligin arttyrý maqsatynda mınıstrlik negizgi baǵyttardy aıqyndady. Olar:
- Lokalızatsııa deńgeıin odan ári arttyrý. Ol úshin negizgi basymdyq — jańa avtokomponentter óndirisin ıgerýge jáne otandyq kásiporyndardy álemniń jetekshi avtokólik kompanııalarynyń óndiris tizbekterine engizý josparlanyp otyr.
- Halyq úshin avtokóliktiń qoljetimdiligin arttyrý. Osy maqsatta avtonesıeleý men lızıng tetikterin jetildirý, onyń ishinde boryshtyq júkteme koeffıtsıentin alyp tastaý jáne jeke adamdarǵa arnalǵan avtolızıngti damytý kózdelgen.
- Elektr jáne gıbrıdti kólik quraldary óndirisin damytý, sondaı-aq olardy paıdalanýǵa qajetti ınfraqurylymdy qalyptastyrý. Bul zarıadtaý stantsııalar jelisin keńeıtýdi, pılotsyz kólik tehnologııalaryn qoldaný úshin qajetti jaǵdaılar jasaýdy qamtıdy.
- Avtokólikterdi ımporttaý kezinde zańnama talaptaryn saqtaýdy qamtamasyz etý. Bul otandyq óndirýshiler men ımporttaýshylar úshin teń ári ashyq básekelestik jaǵdaılaryn qalyptastyrýǵa, sondaı-aq zańsyz shemalardy boldyrmaýǵa múmkindik beredi.
- Menshikti zerthanalyq bazany qurý. Bul avtokólik pen avtokomponentterdiń tehnıkalyq talaptarǵa sáıkestigin el ishinde rastaýǵa, jańa ónimderdi naryqqa jedel shyǵarýǵa jáne otandyq óndiristiń damýyna yqpal etedi.
