Bıyl Qazaqstanda alǵash ret 1 000-nan astam adamnan búırek obyry anyqtaldy
ASTANA. KAZINFORM – 11-15 tamyz aralyǵynda elimizde búırek obyry týraly habardarlyqty arttyrý aptalyǵy ótip jatyr. Apta aıasynda medıtsınalyq mekemelerde bilim berý jáne aqparattyq is-sharalar uıymdastyrylýda.
Qyrkúıek aıynyń 22-31 kúnderi Qazaqstannyń barlyq onkologııalyq mekemeleri men emhanalarynda Ashyq esik kúnderi ótedi. Naqty kúnder týraly aqparat onkologııa ortalyqtarynyń resmı saıttary men áleýmettik jelilerinde jarııalanady.
Apta sheńberinde Qazaq onkologııa jáne radıologııa ǵylymı-zertteý ınstıtýtynyń mamandary segiz óńirde laparoskopııalyq aǵzany saqtaý hırýrgııasy boıynsha master-klastar, dárigerlerge arnalǵan oqytý semınarlary, patsıentterge arnalǵan konsýltatsııalar, sondaı-aq aýrýdyń aldyn alý jáne emdeý boıynsha halyqpen kezdesýler ótkizdi. Áleýmettik jeliler men BAQ arqyly búırek obyry jáne onyń profılaktıkasy týraly 60-qa jýyq aǵartý materıaly jarııalandy.
QazORǴZI derekterine sáıkes, búırek obyry onkologııalyq aýrýlardyń sırek kezdesetin, biraq aýyr túrine jatady. 2024 jyly syrqattanýshylyq deńgeıi 100 myń turǵynǵa shaqqanda 7,6-ny qurap, onkologııalyq aýrýlar qurylymynda segizinshi orynda boldy. 2025 jyldyń alǵashqy jeti aıynda 1009 adamǵa alǵash ret osyndaı dıagnoz qoıylǵan.
Elimizdiń onkologııa ortalyqtarynda TMKKK aıasynda jyl saıyn búırek onkopatologııasy bar eki myńnan astam naýqas tekserilip, em alady. Onyń ishinde 500-den astamy hırýrgııalyq operatsııadan ótedi. Kúrdeli jaǵdaılar Qazaq onkologııa ınstıtýtynda emdeledi, onda joǵary dáldiktegi dıagnostıkalyq zertteýler, aǵza saqtaıtyn jáne robottandyrylǵan operatsııalar, dárilik, targettik jáne ımmýnoterapııa halyqaralyq standarttar boıynsha júrgiziledi.
«Aýrýdy erte kezeńde anyqtaý sátti emdeý múmkindigin aıtarlyqtaı arttyrady. Ol úshin barlyq onkologııa ortalyqtary men kópbeıindi klınıkalarda qoljetimdi ýltradybystyq, kompıýterlik tomografııa jáne zerthanalyq zertteýler júrgiziledi. Dıagnoz qoıylǵannan keıin ımmýnogıstohımııalyq jáne molekýlalyq-genetıkalyq testileý jasalyp, emdeý tásili men boljam aıqyndalady», – dedi Qazaq onkologııa ınstıtýtynyń hırýrgi, onkoýrolog dáriger Hýsan Tálipbaıuly.
Onyń aıtýynsha, búırek obyrynyń qaýip faktorlaryna temeki shegý, semizdik, arterııalyq gıpertenzııa, tuqym qýalaıtyn túrleri jáne sozylmaly búırek aýrýlary jatady. Dáriger salaýatty ómir saltyn ustanýdy, teńdestirilgen tamaqtanýdy, fızıkalyq belsendilikti saqtaýdy, salmaqty baqylaýdy, sondaı-aq neseptegi qan, bel aýrýy nemese kúrt salmaq joǵaltý sııaqty belgiler paıda bolǵan jaǵdaıda dereý dárigerge qaralýdy usynady.
Aıta keteıik, Úkimet Densaýlyq saqtaý mınıstrliginiń quzyretin keńeıtti.