Bıyl Qazaqstanda 6 jańa aqyly jol ýchaskesi engizilýi múmkin
ASTANA.KAZINFORM - Qazir elimizde jalpy uzyndyǵy 4 900 shaqyrym 26 aqyly jol ýchaskesi jumys isteıdi. Joldarda aqaýlar anyqtalǵan jaǵdaıda jol júrý aqysyn ýaqytsha toqtatý normasy engizilgen. Qazirgi kezde 15 ýchaskede jaryqtar men ózge de aqaýlardy joıý jumystary júrgizilip jatyr.
Bul týraly «QazAvtoJol» UK» AQ basqarma tóraǵasy Darhan Imanashev Ortalyq kommýnıkatsııalar qyzmeti alańynda ótken baspasóz máslıhatynda málimdedi.
– Bıyl qosymsha 6 jańa aqyly jol ýchaskesin engizý josparlanyp otyr, – dedi tóraǵa.
Sondaı-aq brıfıng barysynda Darhan Imanashev jol qyzmetteri bıylǵy sý tasqyny kezeńinen aldyn ala júrgizilgen daıyndyq jumystarynyń arqasynda sátti ótkenin atap ótti. 2026 jylǵy sý tasqyny kezinde respýblıkalyq avtojoldarda 5 sý basý faktisi tirkelse, eki jyl buryn mundaı jaǵdaılar sany 178 bolǵan.
Sý tasqynyna qarsy is-sharalardy júrgizýge shamamen 1000 birlik tehnıka men 1900 qyzmetker jumyldyryldy. Sonymen qatar 15 myńǵa jýyq sý ótkizý qubyry tazartylyp, 86 myń tekshe metr ınertti materıal daıyndaldy.
Buǵan deıin aqyly jol júıesi salanyń jumysyna qanshalyqty ıgi áserin tıgizgenin jazǵan bolatynbyz.
