Bıyl Qazaqstanda 44 myńnan astam adam jumyspen qamtylady - Úkimet
ASTANA. KAZINFORM – Úkimette QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen azamattardy jumyspen qamtý jáne NEET sanatyndaǵy jastarmen ataýly jumys júrgizý máseleleri jóninde keńes ótti.
Jıynda qazirgi jaǵdaı boıynsha beıindi memlekettik organdar men oblys ákimdikteriniń ókilderi baıandama jasady. 2025 jyldyń qorytyndysy boıynsha jaldamaly jumyskerler sany 7,2 mln adamǵa, ózin-ózi jumyspen qamtyǵandar sany 2,1 mln adamǵa jetken. Bul rette jumyspen qamtý organdarynda jumys izdep júrgen 333 myńnan astam azamat tirkelgen.
Eńbek jáne halyqty áleýmettik qorǵaý mınıstrliginiń derekterine sáıkes, óńirlerde jyl saıyn jumyspen qamtý kartalary bekitiledi. 2026 jylǵa arnalǵan jospar aıasynda 544 myńnan astam adamdy jumyspen qamtý kózdelgen. Búginde olardyń 140,8 myńy jumyspen qamtyldy.
Ataýly jumys júrgizý úshin C, D, E sanattaryna jatatyn azamattar pýly qalyptastyrylǵan. Qazirgi ýaqytta olardyń 45 myńnan astamy áli de jumyspen qamtý sharalarymen qamtylmaǵan. Mundaı azamattardyń eń kóp sany Almaty, Mańǵystaý jáne Túrkistan oblystarynda tirkelip otyr.
Sonymen qatar keńes barysynda Ǵylym jáne joǵary bilim mınıstrligi alǵash ret elimizdiń barlyq óńirindegi eńbek naryǵyna keshendi taldaý júrgizgeni atap ótildi. Zertteý aıasynda 73 myń kásiporyn qamtylyp, jumys kúshiniń usynysy men ekonomıka suranysy arasyndaǵy sáıkessizdikter júıeli túrde anyqtaldy. Taldaý nátıjeleri eńbek naryǵyndaǵy suranystyń tehnologııalar men jasandy ıntellekt salasyna qaraı oıysyp kele jatqanyn kórsetti. Bul rette tehnıkalyq jáne kásiptik bilimi bar mamandarǵa, eń aldymen kolledj túlekterine degen qajettilik joǵary deńgeıde saqtalyp otyr.
Osyǵan baılanysty Aıda Balaeva joǵary oqý oryndary men kolledjder deńgeıinde kadr daıarlaýdyń tıimdi júıesin qalyptastyrý úshin barlyq memlekettik organnyń úılesimdi jumys isteýi qajet ekenin atap ótti. Úkimet basshysynyń orynbasary ekinshi mańyzdy baǵyt retinde jumyssyz azamattarmen ataýly jumys júrgizýdi belgiledi. Onyń aıtýynsha, statıstıkalyq derekterdiń artynda naqty adamdar turǵanyn eskerip, ár azamat úshin jeke jumyspen qamtý traektorııasyn qalyptastyrý mańyzdy.
Jıynda qaralǵan ekinshi másele – NEET sanatyndaǵy jastarmen jumys. Mádenıet jáne aqparat mınıstrliginiń málimetinshe, sońǵy úsh jylda NEET jastarynyń úlesi kezeń-kezeńimen tómendep keledi. 2025 jyldyń qorytyndysy boıynsha eldegi ortasha kórsetkish 6% qurady. Bul 2023 jylmen salystyrǵanda 1,3%-ǵa tómen.
Mınıstrlik derekterine sáıkes, atalǵan sanattaǵy jastardyń sanyn azaıtý baǵytynda ataýly jumys júrgizilýde. Bul rette jumyspen qamtýǵa járdemdesý sharalaryna basymdyq berilgen. Atap aıtqanda, jastardyń áleýmettik-kásibı portretin qalyptastyrý, olardy jumysqa ornalastyrý, «Jastar praktıkasy» baǵdarlamasyna, qoǵamdyq jáne áleýmettik jumys oryndaryna tartý, sondaı-aq suranysqa ıe kásibı daǵdylar boıynsha oqytý jumystary júrgizilip jatyr. Sonymen birge mansap ortalyqtary jastarǵa jeke qoldaý kórsetip, olardyń eńbek naryǵyna beıimdelýine járdemdesýde.
Aıta keteıik, buǵan deıin múgedektigi bar adamdardy jumyspen qamtıtyn tsıfrlyq qyzmet engiziletini habarlandy.
