Bıyl Qazaqstanda 400-ge jýyq velosıped urlanǵan
ASTANA. KAZINFORM – Qazaqstanda velomaýsymnyń bastalýyna baılanysty polıtsııa velosıped ıelerin qaýipsizdik sharalaryn saqtaýǵa jáne kólikterin qaraýsyz qaldyrmaýǵa shaqyrdy.
Polisia.kz málimetinshe, jyl basynan beri elimizde shamamen 400 velosıped urlyǵy tirkelgen. Onyń jartysynan astamy tabylyp, zańdy ıelerine qaıtarylǵan.
Tártip saqshylarynyń aıtýynsha, urlyqtardyń basym bóligi túngi ýaqytta kópqabatty úılerdiń kireberisterinde, baspaldaq alańdarynda jáne turǵyn úılerdiń aýlalarynda jasalady.
– Polıtseılerdiń aıtýynsha, velosıped ıeleriniń ózi qylmysqa qolaıly jaǵdaı jasap, múlikterin qaraýsyz qaldyrady nemese senimsiz qulyptardy qoldanady, – dep habarlaıdy ІІM.
Osyǵan baılanysty polıtsııa azamattarǵa qaýipsizdik talaptaryn qatań saqtaýdy usynady. Atap aıtqanda, ǵımaratqa kirgen jaǵdaıda velosıpedti ishke alyp kirý nemese ramasy men artqy dońǵalaǵyn bir mezette qulyptaý qajet. Mamandar bolattan jasalǵan shynjyrly qulyptardy nemese U-lock úlgisindegi qapsyrma-qulyptardy paıdalanýǵa keńes beredi.
Sondaı-aq velosıpedterdi tek kúzetiletin turaqtarǵa nemese beınebaqylaý kameralary ornatylǵan oryndarǵa qaldyrǵan jón. Budan bólek, kólik ıelerine velosıpedtiń nemese onyń ramasyndaǵy serııalyq nómirdiń fotosýretin aldyn ala túsirip qoıý jáne erekshe belgilerin este saqtaý usynylady.
– Jaz mezgilinde polıtsııa velosıpedshiler kóp shoǵyrlanatyn oryndarda, ıaǵnı saıabaqtarda, saýda ortalyqtarynyń mańynda jáne velojoldarda patrýldeýdi kúsheıtedi. Turǵyn úı alaptary men turaq aımaqtarynyń mańynda túngi reıdter de júrgiziledi, – delingen habarlamada.
Sonymen qatar quqyq qorǵaý organdary urlanǵan múliktiń zańsyz satylýyna jol bermeý maqsatynda bazarlar men stıhııalyq saýda oryndaryn da tekserýdi jalǵastyrady.
Aıta keteıik, Apple iPhone qurylǵylaryn kóshedegi urlyqtan qorǵaıtyn jańa fýnktsııa ázirlep jatyr.
