Bıyl Qazaqstanda 400-den astam orman órti tirkeldi
ASTANA. KAZINFORM – Órt qaýipti kezeń bastalǵaly beri elimizde 407 orman órti, 4 dala órti jáne qurǵaq shóptiń janýyna qatysty 1 186 oqıǵa tirkeldi, dep habarlaıdy Tótenshe jaǵdaılar mınıstrligi.
Vedomstvonyń málimetinshe, tabıǵı órtterdiń aldyn alý maqsatynda respýblıka boıynsha baqylaý jáne profılaktıkalyq jumystar kúsheıtilgen.
– Órt qaýipti kezeń bastalǵaly beri ormandy-dala alqaptarynda jáne halyq kóp demalatyn oryndarda 8 993 birlesken reıd júrgizildi. Osy jumystarǵa azamattyq qorǵaý, ishki ister, tabıǵatty qorǵaý jáne orman mekemeleri, sondaı-aq jergilikti atqarýshy organdardyń 3 708 qyzmetkerinen quralǵan 655 mobıldi top jumyldyryldy, – delingen mınıstrlik habarlamasynda.
TJM tabıǵı órtterdiń negizgi sebepteriniń biri – azamattardyń órt qaýipsizdigi talaptaryn saqtamaýy ekenin atap ótti. Osyǵan baılanysty vedomstvo turǵyndardy ormanda jáne ashyq aýmaqtarda ot jaqpaýǵa, janǵysh qaldyqtardy órtemeýge, sóndirilmegen temeki tuqylyn tastamaýǵa jáne órt qaýipsizdigi erejelerin qatań saqtaýǵa shaqyrdy.
– Tabıǵı órtterdiń týyndaý qaýpin azaıtý maqsatynda azamattardan órt qaýipsizdigi talaptaryn qatań saqtaýdy suraımyz. Ár adamnyń jaýapkershiligi tabıǵatty jáne eldi mekenderdi tilsiz jaýdan qorǵaýǵa yqpal etedi, – dep málimdedi mınıstrlik.
Aıta keteıik, Katonqaraǵaı ulttyq parkinde shyqqan órt aýyzdyqtaldy.
