Bıyl Qazaqstanda 283 ırrıgatsııalyq kanal avtomattandyrylady
ASTANA. KAZINFORM — Qazaqstanda sýarý ınfraqurylymyn avtomattandyrý jumystary qarqyndy júrgizilip jatyr. Bul týraly Sý resýrstary jáne ırrıgatsııa vıtse-mınıstri Aslan Abdraımov Ortalyq kommýnıkatsııalar qyzmetinde ótken brıfıngte málimdedi.
Onyń aıtýynsha, sý salasyndaǵy mańyzdy baǵyttardyń biri — ırrıgatsııalyq ınfraqurylymdy avtomattandyrý. Qazirgi tańda negizgi mindetterdiń biri — berilgen sý kólemin naqty esepke alý ǵana emes, ony tıimdi basqarý.
— Biz ırrıgatsııalyq júıelerdegi sý jetkizýdi avtomattandyrylǵan basqarý júıesine kóship jatyrmyz. Bul kanaldardaǵy jaǵdaıdy naqty ýaqyt rejıminde baqylaýǵa jáne sý resýrstaryn jedel basqarýǵa múmkindik beredi. Tsıfrlyq tehnologııalar sý resýrstaryn basqarý kezindegi shyǵyndardy azaıtýdyń tıimdi quraly. Bıyl 283 ırrıgatsııalyq kanaldy avtomattandyrýdy josparlap otyrmyz.
Qazsýshardyń ınvestıtsııalyq baǵdarlamasy aıasynda respýblıkalyq bıýdjetten qoldaý kórsetilip jatyr. Jalpy avtomattandyrý jumystary Jambyl, Qyzylorda, Túrkistan jáne Almaty oblystaryn qamtıdy, — dedi Aslan Abdraımov.
Vıtse-mınıstrdiń málimetinshe, jobalardy iske asyrý barysynda otandyq jáne sheteldik tehnologııalyq sheshimder qatar qoldanylady.
Ásirese, elimizde sý ınfraqurylymyn avtomattandyrýǵa arnalǵan jekelegen tehnologııalardy óndirý jolǵa qoıylyp kele jatqany mańyzdy. Bul óz kezeginde otandyq óndirýshilerdi qoldaýǵa, jergilikti quzyretterdi damytýǵa jáne syrtqy jetkizýshilerge táýeldilikti azaıtýǵa múmkindik beredi. Sonymen qatar transshekaralyq sý nysandarynda halyqaralyq tájirıbede tıimdiligi dáleldengen úzdik sheteldik tehnologııalar paıdalanylyp jatyr.
Spıkerdiń aıtýynsha, mınıstrlik jasandy ıntellekt pen zamanaýı analıtıkalyq quraldardy engizýge de erekshe nazar aýdaryp otyr. Osy baǵytta QR Jasandy ıntellekt jáne tsıfrlyq damý mınıstrligimen birlesip, sý salasynda jasandy ıntellekt, úlken derekterdi óńdeý, analıtıkalyq platformalar men tsıfrlyq sheshimderdi paıdalaný tetikteri pysyqtalyp jatyr.
Aıta keteıik, Qazaqstanda Sý resýrstarynyń ulttyq aqparattyq júıesi bir aı ishinde iske qosylady.
