Bıyl Qazaqstanda 19 mln sharshy metr turǵyn úı paıdalanýǵa berilmek
ASTANA. KAZINFORM — Vıtse-premer — ulttyq ekonomıka mınıstri Serik Jumanǵarın ótkizgen keńeste bıylǵy 5 aıdaǵy elimizdiń JІÓ ósiminiń quramdas bóligi men ekonomıkaǵa qomaqty úles qosyp otyrǵan salalardyń damý serpinin arttyrý múmkindikteri talqylandy. Bul týraly QR Úkimeti málim etti.
— Ónerkásip ekonomıkalyq ósýdiń negizgi qozǵaýshy kúshi bolyp qala beredi: 2024 jylǵy qorytyndy boıynsha onyń JІÓ-degi úlesi 25,7%-dy qurady. 2025 jylǵy qańtar–mamyr aılarynda sala 6,4%-ǵa ósken. Degenmen, qarqyn báseńdep barady: bir aı buryn ósim 6,6%-dy quraǵan. Onyń basty sebebi — óndiristiń óskenine qaramastan óńdeý ónerkásibiniń baıaýlaýy. Ónerkásiptik óndiris ındeksiniń tómendeýi úsh óńirde: Shyǵys Qazaqstan oblysy (90,4%), Ulytaý oblysy (96,2%) jáne Qostanaı oblysynda (97,6%) tirkeldi, — delingen habarlamada.
Óńdeý josparynan artta qalý, eń aldymen, óńdeý ónerkásibiniń 40%-yn quraıtyn metallýrgııamen baılanysty. Keńeste basqa segmentterdegi — mashına jasaý, tamaq, hımııa jáne munaı óńdeý ónerkásibindegi ósý áleýeti de qarastyryldy.
Belsendi ósý qarqyny bar taǵy bir sala — qurylys. Onyń 5 aıdaǵy ósimi 15,4%-dy, jumys kólemi 2 trln teńgeni qurady. Alaıda, eki óńir, Atyraý men Ulytaý oblystary artta qalyp keledi. Atyraýda (jospardyń 43,2%) TShO jobasy sheńberinde zaýyt jumysynyń toqtaýyna baılanysty, Ulytaýda (78,4%) taý-ken óndirý salasyndaǵy nysandar salý men jóndeýdiń qysqarýyna baılanysty qarqyn báseńdegen.
Turǵyn úı qurylysy salasynda bıyl 19 mln sharshy metr turǵyn úıdi paıdalanýǵa berý mindeti tur. Sońǵy 5 aıda 6 mln sharshy metr turǵyn úı paıdalanýǵa berilgen. Bul 2024 jylǵy qańtar-mamyrmen salystyrǵanda 5,7%-ǵa joǵary.
— Bizdiń maqsatymyz — bıyl JІÓ 6%-dyq ósimine qol jetkizý. Ol úshin naqty sektordaǵy barlyq sala belgilengen ındıkatorǵa sáıkes jumys isteýi tıis. Ákimshilik kedergilerdi jedel joıyp, kompanııalar óz ónimin shyǵarýdy ulǵaıtýy úshin árbir saladaǵy qarqynnyń baıaýlaýy esebinen naqty aılyq josparlar ázirleý qajet, — dep atap ótti Serik Jumanǵarın.
Eske sala keteıik, buǵan deıin jyl basynan beri ıpotekalyq baǵdarlamalar boıynsha 11 myńnan astam nesıe berilgenin jazǵan edik.