Bıyl Qazaqstanda 1,7 trln teńgege 200 jańa óndiris iske qosylady
ASTANA. KAZINFORM — Qazaqstanda jyl basynan beri jalpy quny 252 mlrd teńgeni quraıtyn 74 óndiristik joba iske qosylyp, 4,3 myńnan astam turaqty jumys orny quryldy. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málimdedi. Sonymen qatar bıyl taǵy 200 ınvestıtsııalyq jobany júzege asyrý josparlanyp otyr.
Mınıstrdiń aıtýynsha, eldegi óńdeý ónerkásibi 9% ósti. Atalǵan ósim jańa iske qosylǵan óndirister esebinen múmkin bolyp otyr.
— Byltyr 190 joba paıdalanýǵa berilip, sonyń nátıjesinde óndiris kólemi ulǵaıyp, jańa jumys oryndary ashyldy. Bıyl jalpy quny 1,7 trln teńge bolatyn 200 ınvestıtsııalyq jobany iske asyrý josparlandy, — dedi Ersaıyn Naǵaspaev.
Búgingi tańda jalpy quny 252 mıllıard teńge bolatyn 74 joba paıdalanýǵa berilip, 4,3 myńnan astam turaqty jumys orny quryldy.
Óńdeý ónerkásibin turaqty damytý maqsatynda salalyq normatıvtik-quqyqtyq qujattar qabyldanyp jatyr. 24 maýsymda Mashına jasaý salasyn damytý máseleleri jónindegi Zańǵa qol qoıylyp, onyń aıasynda birneshe mańyzdy sharalar engizildi.
— Atap aıtqanda, memleket qoldaý kórsetetin ónerkásip klasterleri qurylady. Bul iri kásiporyndar men elimizdiń barlyq óńirindegi shaǵyn jáne orta bıznestiń óndiristik kooperatsııasyn damytýǵa múmkindik beredi. Kólik quraldarynyń bólshekterin ónerkásip qurastyrý kelisimi jasalǵanda qazaqstandyq taýarlardy paıdalaný mindeti qarastyryldy. Óndiris qýattarynyń teńgerimin baǵalaý júıesi engiziledi. Bul memlekettik qoldaý sharalaryn ishki naryqtyń suranysyna saı tıimdi josparlaýǵa múmkindik beredi, — dep tolyqtyrdy mınıstr.
Sonymen birge, Memleket basshysynyń tapsyrmasyna sáıkes arnaıy ekonomıkalyq aımaqtardyń jańa modeli ázirlendi. Jańa model ınvestorlarǵa qyzmet kórsetýdiń «bir tereze» qaǵıdatyn engizýdi kózdeıdi.
— Budan bólek, jeke operatorlardy tartý jáne ınfraqurylymdy damytý josparlanǵan. Onyń ishinde daıyn óndiristik ǵımarattar salynady. Bul jańa óndiristerdi iske qosý merzimin qysqartyp, arnaıy ekonomıkalyq aımaqtardyń ınvestıtsııalyq tartymdylyǵyn arttyrady. Jalpy alǵanda, qabyldanǵan zańnamalyq ózgerister óńdeý ónerkásibiniń turaqty damýyna oń áser etedi, — dedi Ersaıyn Naǵaspaev.
Eske sala ketsek, Memleket basshysy Qasym-Jomart Toqaev Parlament palatalarynyń birlesken otyrysynda aldaǵy eki jylda 200-den astam jańa óndiris orny ashylatynyn aıtqan edi.
