Bıyl Qazaqstanda 12 myń shaqyrym ınjenerlik jeli jóndeledi
ASTANA. KAZINFORM — Bıyl elimizde 1,1 trln teńgeden astam qarjyǵa 12 myń shaqyrym ınjenerlik jeli jóndeledi. Bul týraly Ulttyq ekonomıka vıtse-mınıstri Asan Darbaev Úkimet otyrysynda málimdedi.
Onyń aıtýynsha, Prezıdent tapsyrmasymen júzege asyrylyp jatqan «Energetıkalyq jáne kommýnaldyq sektorlardy jańǵyrtý» ulttyq jobasy daıyndyq kezeńinen naqty qurylys jumystaryna kóship jatyr. 2026 jyly 8 kásiporyn ınfraqurylymnyń asa joǵary tozý aımaǵynan ortasha tozý sanatyna shyǵarylady.
— Bıyl jalpy kólemi 1 trln 138 mlrd teńgege 12 myń shaqyrym ınjenerlik jelini jóndeý kózdelgen. Onyń ishinde 759 mlrd teńge qurylys jumystaryna baǵyttaldy. Qalǵan 379 mlrd teńge boıynsha jobalaý-smetalyq qujattama ázirlenip, otandyq óndirýshilerden materıaldar alynyp jatyr, — dedi Ulttyq ekonomıka vıtse-mınıstri.
Ulttyq joba aıasynda otandyq óndiristi qoldaýǵa da erekshe mán berilip otyr. 2029 jylǵa deıin shamamen 2 trln teńgeniń ónimine suranys qalyptasqan. Qazir E-Ondiris platformasynda 492 otandyq taýar óndirýshi tirkelgen.
Elektr energetıkasy salasynda 15 758 shaqyrym jelini jóndeý josparlanǵan. Sonyń nátıjesinde eki jylda elektr jelileriniń ortasha tozý deńgeıi 67 paıyzdan 62 paıyzǵa deıin tómendeıdi. Apattyq jaǵdaılar sany 3,9 paıyz, elektr energııasynyń shyǵyny 0,6 paıyz qysqarady.
Sýmen jabdyqtaý júıelerin jańartýǵa 154 mlrd teńge ınvestıtsııa qarastyrylǵan. Bul qarajatqa shamamen 1,5 myń shaqyrym jeli jóndeledi. Nátıjesinde jelilerdiń ortasha tozýy 39 paıyzdan 36 paıyzǵa deıin azaıyp, sý shyǵyndary 1,2 paıyz qysqarady.
— Eń kúrdeli jaǵdaı sý burý salasynda saqtalyp otyr. Bul baǵytta 803 shaqyrym jelini jóndeýge 94 mlrd teńge ınvestıtsııa salynady. Jospar oryndalǵan jaǵdaıda káriz jelileriniń ortasha tozý deńgeıi 55 paıyzdan 52 paıyzǵa deıin tómendeıdi, — dedi A. Darbaev.
Aıta keteıik, Memleket basshysynyń tapsyrmasymen Úkimet «Energetıkalyq jáne kommýnaldyq sektorlardy jańǵyrtý» ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
