Bıyl Qazaqstanda 1,1 mln tonna qant qyzylshasyn jınaý josparlanǵan
TARAZ. KAZINFORM — Qant qyzylshasynyń ónimin qant zaýyttary tolyǵymen qabyldaıtyn bolady. Bıyl elimizde qyzylsha ósirýden rekordtyq kórsetkishti ıgerý josparlanǵan. 1,1 mln tonna qant qyzylshasyn jınaý josparlanyp otyr.
Búgingi tańda qarqyndy egin jınaý jumystary júrgizilip jatyr.
Alaıda, egindi qabyldaý kezinde kezekterdiń paıda bolýymen jáne i uzaq kútýge baılanysty qıyndyqtar týyndap, bul fermerlerdiń narazylyǵyn týdyrdy.
Osyǵan baılanysty Aýyl sharýashylyǵy mınıstrligi men Jambyl oblysynyń ákimdigi jaǵdaıdy sheshýge baǵyttalǵan birqatar sharalar qabyldady.
Birinshisi-10 qazannan bastap Merki qant zaýytynyń qant qyzylshasyn qabyldaýdyń táýliktik qýaty qosymsha tóseý mashınalary esebinen 4,5 myńnan 5,9-6 myń tonnaǵa deıin ulǵaıtyldy.
Ekinshisi-Merki qant zaýytynyń aktsıonerlerimen buryn bekitilgen keste boıynsha qant qyzylshasyn qabyldaý týraly ýaǵdalastyqqa qol jetkizildi. Bul fermerlerdiń qyzylshany óńdeýge jetkizýin retteýge múmkindik beredi.
Úshinshisi- 100 km-den astam qashyqtyqtaǵy sharýashylyqtarǵa kólik shyǵyndaryn óteý úshin 3 teńge/kg tólenetin bolady.
Merki zaýyty bıyl barlyǵy 450 myń tonna qyzylsha qabyldaıdy.
Búgingi tańda qant zaýyttary 362 myń tonna qyzylshany (Merki – 116 myń tonna, Kóksý – 129 myń tonna, Aqsý – 117 myń tonna, onyń ishinde Jambyl oblysynan 9,6 myń tonna) óńdeýge qabyldady.
Úkimet Qazaqstanda óndirilgen qant qyzylshasynyń barlyq kólemin Qazaqstannyń qant zaýyttarynda qabyldaýyna kepildik beredi.
Esterińizge sala keteıik, Premer-Mınıstr Oljas Bektenovtyń tóraǵalyǵymen qant qyzylshasyn jınaý qarsańynda birneshe keńes ótkizildi. Olardyń qorytyndysy boıynsha AShM oblys ákimdikterimen jáne zaýyttarmen birlesip qant qyzylshasyn júkteý jospary men qabyldaý kestesi ázirlendi. Qant zaýyttaryn aınalym qarajatymen qamtamasyz etý úshin qajetti normatıvtik-quqyqtyq aktiler aldyn ala qabyldandy. Merki qant zaýytynyń qýattylyǵynyń jetispeýshiligin eskere otyryp, Jambyl oblysynyń 100 myń tonna qant qyzylshasyn Jetisý oblysyndaǵy Aqsý qant zaýytyna qaıta baǵyttaý týraly sheshim qabyldandy. Bul rette, fermerlerge kólik shyǵyndaryn óteý maqsatynda sýbsıdııalaý normatıvi tonnasyna 25 myń teńgeden 45 myń teńgege deıin ulǵaıtyldy.
Aıta ketý kerek, Qazaqstanda jumys istep turǵan 4 qant zaýytynyń qazyrgi qýattaryn jańǵyrtýdy qajet etedi.
2025 jyly Merki qant zaýytynyń qýaty 3 myńnan 4 myń tonnaǵa deıin keńeıtiletin bolady.
Birneshe jylda Taraz qant zaýytynda qant qyzylshasyn óńdeý boıynsha tehnologııalyq jeli ornatý, Kóksý qant zaýytynyń qýatyn táýligine 4 myń tonnaǵa deıin arttyrý josparlanýda.
Sondaı-aq jaqynda Úkimette Jambyl oblysynda 1 mln tonna qant qyzylshasyn óńdeýdi qamtamasyz etetin jańa qant zaýytyn salý jobasy tanystyryldy. Osy sharalardyń barlyǵy jumys istep turǵan qant zaýyttaryn jańǵyrtýmen birge ishki naryqtyń qant boıynsha ımportqa táýeldiligin aıtarlyqtaı tómendetýge múmkindik beredi.
