Bıyl Qazaqstan úshin naǵyz órleý jyly boldy —Prezıdent

TARAZ. KAZINFORM — Bul týraly Memleket basshysy Jambyl oblysynyń jurtshylyǵymen kezdesý barysynda aıtty. 

Memleket basshysy janashyrlyq pen qamqorlyqty, tazalyq pen jaýapkershilikti arqaý etken jańa mádenıet qalyptasyp keletinin aıtty.

— Osy oraıda, «Taza Qazaqstan» jalpyulttyq aktsııasyn aıryqsha atap ótkim keledi. Bıyl elimizde 335,6 mıllıon aǵash egildi. Rasynda, osy biregeı joba halyqtyq sıpatqa ıe boldy, elimizdiń bolmysyn, sana-sezimin ózgertýge zor yqpal etti.

Men ózim osy jalpyulttyq qozǵalysqa erekshe mán berip otyrmyn. Taza bolý degenimiz, bul — óte tereń, mańyzdy uǵym. Bul — eń aldymen, kóshelerimiz, úılerimiz, páterimiz taza bolýy kerek degen sóz. Nıetimiz de árqashan taza bolýy qajet. Keń dalamyzda jasyl jelek, aǵash kóp ósýi kerek. Túptep kelgende, tazalyq — ulttyq bolmysymyzdyń ajyramas bóligine aınalýy qajet, — dedi Prezıdent.

Qasym-Jomart Toqaev bıyl Qazaqstan úshin naǵyz órleý jyly bolǵanyn aıtty.

Jalpy, osy jyl Qazaqstan úshin naǵyz órleý jyly boldy dep aıtsaq, artyq bolmaıdy.

— Oqýshylarymyz túrli bilim dodasynan 1 myńnan astam medal aldy. Sportshylarymyz el mereıin ósirip, kók baıraǵymyzdy bıikte jelbiretti. Ónerli órenderimiz tól mádenıetimizdi tórge ozdyrdy. Jer júzi halqymyzdy rýhy bıik ári ozyq oıly ult retinde tanı bastady, — dedi ol. 

Aıta ketelik Memleket basshysy Jambyl oblysynyń ekonomıkasyn kúsheıtý kerek, oǵan qajetti jaǵdaı da, múmkindik te bar ekenin aıtqan edi.