Bıyl Qazaqstan-Serbııa dıplomatııalyq qatynasyna 30 jyl tolady

ASTANA. KAZINFORM — Qos memleket 30 jylda ózara senim men túsinistiktiń berik irgetasyn qalady. Bul jóninde Serbııa Respýblıkasynyń Qazaqstandaǵy Tótenshe jáne ókiletti elshisi Vladımır Iovıchıch málimdedi. 

Alǵashqy Qazaqstan-Serbııa Іskerlik keńesi jáne Qazaqstan-Serbııa Bıznes forýmynda sóz alǵan Vladımır Iovıchıch jyl sońynda Qazaqstan-Serbııa dıplomatııalyq qatynastaryna 30 jyl tolatynyn atap ótti.

Onyń sózinshe, Serbııa Qazaqstandy Orta Azııadaǵy, al Qazaqstan Serbııany ońtústik-shyǵys Eýropadaǵy basty seriktesi dep esepteıdi. Qos memlekettiń saıası turǵyda eshqandaı kelispeýshiligi joq.

Vladımır Iovıchıch endi dostyq baılanysty ınvestıtsııa jáne bıznes salalarynda tereńdetý kerek degen pikirde.

— Mashına jasaý, óndiris, energııa tárizdi salalarda qazirdiń ózinde birlesip jumys istep jatyrmyz. Biraq munymen shektelmeýimiz qajet. IT, jasandy ıntellekt, tsıfrlandyrý, logıstıka, transportatsııa, farmatsevtıkada da jemisti áriptestik ornatqanymyz jón, — dedi ol.

Sonymen qatar, dıplomat qos el de geografııalyq jaǵynan óte tıimdi ornalasqanyna toqtaldy. Dıplomatııalyq qatynastardyń 30 jyldyǵynda tek jetken jetistikterdi ǵana atap ótpeı, keleshekke úlken josparlar qurýǵa úndedi.

Aıta keteıik, buǵan deıin serb ınvestorlaryna Qazaqstandaǵy basym salalar usynylǵanyn jazǵanbyz.