Bıyl Qazaqstan quramasy qatysatyn negizgi sport jarystary ataldy
ASTANA. KAZINFORM – Bıyl elimizde halyqaralyq deńgeıdegi birneshe jarys ótedi. Al otandyq sportshylar ádettegideı álemniń ár qıyrynda uıymdastyrylatyn dúbirli dodalarda baq synaıdy.
Týrızm jáne sport mınıstrligi atap ótkendeı, bul kúnderi Almatydaǵy «Shymbulaq» taý-shańǵy kýrortynda frıstaıl-mogýl jáne frıstaıl-akrobatıkadan jasóspirimder arasyndaǵy álem chempıonaty ótip jatyr. Jarysqa Qazaqstan, Germanııa, Kanada, Qytaı, Frantsııa, AQSh, Ońtústik Koreıa jáne basqa da elderden 100-den astam sportshy óner kórsetýde. Chempıonatta alty sport túri boıynsha 196 medal jıyntyǵy sarapqa salynady. El quramasy sapynan bolashaǵynan úmit kúttiretin jas daryndy sportshylar qatysyp jatyr. Olardyń qatarynda Anastasııa Gorodko, Dinmuhammed Raıymqul, Ilnar Ibragımov jáne basqa da sańlaqtar bar.
Aqpan aıynda Qazaqstan ulttyq quramasy Qytaıdyń Harbın qalasynda ótetin IX qysqy Azııa oıyndaryna qatysady. Sary qurlyq dodasyna 139 qazaqstandyq sportshy bıatlon, shaıbaly hokkeı, mánerlep syrǵanaý, short-trek jáne basqa da sport túrleri boıynsha baq synaıdy. Jarysqa 32 elden 1000-nan astam atlet qatysady dep kútilýde.
Al otandyq sportshylar bıyl BAÁ-de ótetin II «Bolashaqtyń oıyndaryna» qatysady. Buǵan deıin Memleket basshysynyń bastamasymen Qazaqstan 2026 jyly dástúrli sport pen kıbersportty biriktiretin biregeı týrnır – Phygital Games of the Future jarysyn ótkizý quqyǵyna ıe bolǵan edi. Sporttyq is-sharany ótkizý quqyǵy úshin Qazaqstan, Perý jáne Chılı memleketteri baq synaǵan bolatyn.
Sondaı-aq jerlesterimiz bıyl birneshe mańyzdy jarystarda synǵa túsedi. Atap aıtqanda, Er-Rııadtaǵy (Saýd Arabııasy) VI Islam yntymaqtastyq oıyndary, Bakýdegi (Ázerbaıjan) III TMD oıyndary jáne Chendýdegi (Qytaı) XII Dúnıejúzilik oıyndaryna qatysady. Jalpy 2025 jyly otandyq sportshylar 100-den astam halyqaralyq jáne respýblıkalyq deńgeıdegi sporttyq týrnırler men jarystarda baq synaıdy dep josparlanǵan.
Eske salsaq, budan buryn Almaty frıstaıldan álem kýbogynyń kezeńderin ótkizýge daıyndalyp jatqanyn jazdyq.