Bıyl Qazaqstan Qarýly Kúshterinde myńnan asa jaýyngerlik daıarlyq is-sharalary ótkizildi
Áskerı oqý-jattyǵýlar, jaýyngerlik atystar, jattyǵýlar men praktıkalyq sabaqtar bólimshelerdiń jaýyngerlik ázirligi men jaýyngerlik qabiletin, armııany jasaqtaý júıesin jetildirýge jáne aýmaqtyq áskerlerdi damytýǵa baǵyttalǵan.
Qazaqstan aýmaǵynda barlyǵy 6 halyqaralyq oqý-jattyǵý ótti. Sonymen qatar áskerı qyzmetshiler basqa elderdegi 24 oqý-jattyǵýǵa jáne jarystarǵa qatysty, dep habarlaıdy Kazinform QR Qorǵanys mınıstrliginiń baspasóz qyzmetine silteme jasap.
Túrkııada Kars eldimekeniniń «Aqbala» polıgonynda ótkizilgen «Kysh-2023» kópultty jaýyngerlik oqý-jattyǵýy barysynda qazaqstandyq áskerı qyzmetshiler taktıkalyq-arnaıy daıarlyq deńgeıiniń joǵary ekenin kórsetti. Oǵan Ázerbaıjan, Bosnııa jáne Gertsegovına, Grýzııa, Túrkııa jáne Ózbekstannyń áskerı kontıngentteri qatysty.
Ázerbaıjanda ótken «Hazrı-2023» birlesken taktıkalyq oqý-jattyǵýlaryna «Saryarqa», «Oral» zymyrandy-artıllerııalyq korablderi jáne «Jaıyq» gıdrografııalyq kemesi jumyldyryldy. Kaspıı teńiziniń Ázerbaıjan sektoryndaǵy jattyǵýlar eki eldiń áskerı qyzmetshileri arasynda ózara tájirıbe almasýǵa yqpal etti.
Ózbekstandaǵy «Angren» taý polıgonyndaǵy «Qalqan-2023» taktıkalyq-arnaıy oqý-jattyǵýyna Qazaqstan tarapynan armııalyq, áskerı-kóliktik avıatsııa bólimsheleri, sondaı-aq Parashıýttik daıarlaý ortalyǵynyń mamandary qatysty. Qorǵanys mınıstri general-polkovnık Rýslan Jaqsylyqov oqý-jattyǵýdyń belsendi kezeńin baqylady.
Halyqaralyq áskerı yntymaqtastyq josparyna sáıkes Belarýs aýmaǵynda UQShU-ǵa múshe memleketterdiń áskerı kontıngentterimen «Ózara is-qımyl-2023» birlesken oqý-jattyǵýy jáne «Іzdeý-2023» arnaıy oqý-jattyǵýy ótkizildi.
Eki eldiń áskerı ushqyshtary men Qazaqstannyń Desanttyq-shabýyldaý áskerleri áskerı qyzmetshileriniń qatysýymen Qazaqstan men Úndistannyń «QazÚndi-2023» birlesken oqý-jattyǵýy ótti.
Memleket basshysy Qasym-Jomart Toqaevtyń Jetisý oblysyndaǵy polıgonynda vedomstvoaralyq úılestirýdi qamtamasyz etý, kúsh qurylymdarynyń jedel jáne áskerı-tehnıkalyq úılesimdiligin jolǵa qoıý jónindegi tapsyrmasyn iske asyrý úshin Desanttyq-shabýyldaý áskerleriniń bólimshelerimen taktıkalyq oqý-jattyǵýlar jáne «Beket-2023» oqý-jattyǵýy ótti.
Shyǵys Qazaqstan, Almaty jáne Qaraǵandy oblystaryndaǵy «Shyǵys», «Novo-Ahmırovo», «Izendi» jáne «Spassk» polıgondarynda «Shyǵys-2023» jedel-taktıkalyq komandalyq-shtabtyq oqý-jattyǵýy ótti. Oǵan 5 myńǵa jýyq áskerı qyzmetshi jáne 1,5 myń qarý-jaraq pen áskerı tehnıka jumyldyryldy.
«Jaǵalaý» oqý-jattyǵý polıgonynda ótken «Batyl toıtarys-2023» strategııalyq komandalyq-shtabtyq oqý-jattyǵýlarynyń barysyn QR Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaev baqylady. Onymen bir mezgilde Kaspıı teńiziniń akvatorııasynda Áskerı-teńiz kúshteri avıatsııa men Arnaıy operatsııalar kúshteriniń qoldaýymen mańyzdy obektilerdiń qaýipsizdigin qamtamasyz etti. Birlesken oqý-jaýyngerlik mindetter Almaty, Qaraǵandy, Soltústik Qazaqstan jáne Abaı oblystaryndaǵy polıgondarda da oryndaldy.
Jumyldyrý daıyndyǵy sharalary sheńberinde «Ońtústik» ÓńQ áskerı bólimderimen jáne Jambyl oblysynyń qorǵanys isteri jónindegi departamentimen oqý-jattyǵýlar, Pavlodar, Mańǵystaý oblystary men Almaty qalasy aýmaqtyq qorǵanys brıgadalary basqarmasymen komandalyq-shtabtyq jumyldyrý oqý-jattyǵýlary ótkizildi.
Jalpy Qarýly Kúshterde myńǵa jýyq jaýyngerlik daıarlyq sharalary, jaýyngerlik mashınalardy júrgizýden 16 myńnan asa sabaq jáne 40 myńnan astam jaýyngerlik atys ótkizildi. Olardyń barlyǵy jeke quramnyń dalalyq mashyǵyn jetildirýge jáne bólimshelerdi jaýyngerlik úılestirýge baǵyttaldy.
