Bıyl Qazaqstan bankteri qansha tabys tapty
Qazaqstanda ekinshi deńgeıdegi 21 bank jumys isteıdi. Jyl basynan beri olardyń aktıvteri 48,4 trln teńgeni qurady. Bul jóninde QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty, dep habarlaıdy Kazinform tilshisi.
«Qazirgi ýaqytta bank sektory turaqty damýda. Bank sektoryn kapıtaldandyrý kórsetkishteri joǵary, bul aǵymdaǵy kúızelisterdi eńserýge múmkindik beredi. Bank sektorynda 21 ekinshi deńgeıli bank bar. Onyń ishinde sheteldiń qatysýymen 11, memlekettiń 100% qatysýymen 2 bank jumys isteıdi. 2023 jylǵy 10 aıdyń qorytyndysy boıynsha bankterdiń aktıvteri 8,6%-ǵa ulǵaıyp, 48,4 trln teńgeni qurady. Bank júıesindegi klıentterdiń salymdary 4,8%-ǵa ósip, 33,1 trln teńgeni qurady», - dedi spıker Ortalyq kommýnıkatsııalar qyzmetinde ótken baspasóz máslıhatynda.
O.Qızatov halyq pen bıznes depozıtteriniń turaqty ósip kele jatqanyn atap ótti. Olar 5 jyl ishinde eki esege ulǵaıǵan.
«Jyl basynan bergi ulǵaıý 4,8%-dy quraıdy, bul bank júıesine degen senimniń joǵary deńgeıin rastap otyr. Depozıttik bazany dollarlandyrý deńgeıi jyl basynan beri 36,7%-dan 29,5%-ǵa deıin tómendedi. Bank sektorynyń qazirgi syn-táýekelderdi óteý úshin jetkilikti kapıtal qory bar. Negizgi kapıtaldyń jetkiliktilik koeffıtsıenti – 19,3%, menshikti kapıtaldyń jetkiliktilik koeffıtsıenti – 21,8%, bul zańnamada belgilengen normatıvterden edáýir asady», - deıdi O. Qızatov.
Bank sektorynyń menshikti kapıtaly 6,4 trln teńgege jetken, ol bólinbegen paıdany ulǵaıtý esebinen jyl basynan beri 22,7%-ǵa ulǵaıdy.
«2023 jylǵy 10 aıda bankter 1,8 trln teńge mólsherinde paıda aldy, bul 2022 jylǵy osyndaı kezeńmen salystyrǵanda 53,7%-ǵa kóp. Ol kóp jaǵdaıda bankterdiń paıyzdyq kiristeriniń ulǵaıýyna baılanysty boldy. Bank aktıvteri rentabeldiliginiń kórsetkishi 4,6%, kapıtal rentabeldiligi 36,2%-dy qurady. 1 qarashadaǵy jaǵdaı boıynsha bankterdiń ótimdiligi joǵary aktıvteri 14,6 trln teńgeni nemese aktıvterdiń 30%-yn qurady. Bul bankterdiń klıentter aldyndaǵy mindettemelerine tolyq kólemde qyzmet kórsetýine múmkindik beredi», - dedi tóraǵanyń orynbasary.
Sonymen birge, portfel sapasynyń kórsetkishteri de aıtarlyqtaı jaqsarǵan.
«Jumys istemeıtin kredıtter koeffıtsıenti tarıhı turǵydan eń tómen mánge jetip, 2022 jyldyń basynan beri 3,3% deńgeıinde saqtalyp otyr. Bul kólemniń 73,1%-y provızııalarmen, qaryzdardyń qalǵan bóligi turaqty kepil túrlerimen óteldi», - deıdi Oljas Qızatov.