Bıyl Qazaqstan astyǵyn jańa naryqtarǵa ótkizý kerek – depýtat
ASTANA. KAZINFORM — Bıyl Qazaqstanda jınalǵan mol astyqty shetel naryǵyna ótkizýde qıyndyqtar bolýy múmkin. Bul týraly Májilis depýtaty Aıdarbek Qojanazarov aıtty.
«Rosselhoznadzor bizdiń astyqqa qatysty kedergiler jasap jatyr dep sanaımyn. Qazaqstannyń eksporttaýshylary óziniń ónimin Reseı aýmaǵy arqyly Eýropaǵa tasymaldaý kezinde qıyndyqqa tap boldy. Taýarlaryn toqtatyp, sanıtarlyq sertıfıkattaryn bermeı jatyr. Bul óz kezeginde úlken shyǵyndarǵa ákelýi yqtımal. Osy jyly 25,2 mln tonna kóleminde mol astyq jınaldy. Sondyqtan bul ónimdi tıimdi eksporttaý mindeti tur», - dedi A. Qojanazarov Parlament Májilisinde tilshiler suraǵyna jaýap bere otyryp.
Onyń paıymynsha, QR Saýda jáne ıntegratsııa mınıstrligi osy máseleni sheshýge kirisýi kerek.
«Bizdiń Ortalyq Azııa, Aýǵanstan sııaqty dástúrli naryqtarymyz bar. Olar jyl saıyn alyp otyrǵan kólemde astyq alady. Al qalǵan mol ónimdi jańa naryqqa baǵyttaý qajet. Sondyqtan kórshi elmen úkimet deńgeıinde qolaıly kelissóz bolýy tıis», - dedi depýtat.
Aıta keteıik, búgin Májilistiń jalpy otyrysynda atalǵan máselege qatysty Aıdarbek Qojanazarov Úkimet basshysy Oljas Bektenovtiń atyna saýal joldady.
«2024 jyldyń 23 qyrkúıeginen bastap Reseı Federatsııasy Qazaqstannyń astyǵy men aýyl sharýashylyǵy ónimderiniń Reseı aýmaǵy arqyly ótýine birjaqty shekteýler engizdi. Osy teris sheshimniń nátıjesinde astyqqa, dán ónimderine, kúnbaǵys tuqymyna, qyzanaq, burysh jáne basqa da ónimderge fıtosanıtarlyq sertıfıkat berýdi toqtatty. Halyqaralyq kelisimder jaıyna qaldy», - dedi depýtat.
Onyń aıtýynsha, Rosselhoznadzor engizgen shekteýler Eýrazııalyq ekonomıkalyq odaq týraly sharttyń talaptaryn buzyp tur.
«Reseı Federatsııasymen resmı kelissózderdi bastaý kerek. Qazaqstandyq ónimniń tranzıtine negizsiz fıtosanıtarlyq shekteýler joıylsyn. Qazaqstandyq ónimniń eksporty úshin basqa da logıstıkalyq baǵyttardy iske qosýymyz kerek. Máselen, Kaspıı teńizi arqyly Ázerbaıjan, Iran jáne Túrikmenstannyń qatysýymen tasymaldaýdy uıymdastyrý qajet. Kerek bolsa ónim tasymaly úshin sýbsıdııa qarastyryńyzdar. Bul Reseılik tranzıtke táýeldi bolýdyń jolyn kesedi. Sonymen qatar, Qytaımen arada Qazaqstan astyǵy men basqa da aýyl sharýashylyǵy ónimderin ótkizýge arnalǵan kvotalardy ulǵaıtý máselesin qaraý qajet», - dedi Aıdarbek Qojanazarov.
Budan buryn habarlanǵandaı, QR Aýyl sharýashylyǵy vıtse-mınıstri Ermek Kenjehanuly Rosselhoznadzordyń Qazaqstannan Reseıge astyq, qyzanaq, kúnbaǵysty eksporttaýdy toqtata turý týraly ótinishine qatysty pikir bildirdi.
Eske sala keteıik, bıyl tamyz aıynda 2024 jylǵy 31 jeltoqsanǵa deıin bıdaıdy (SEQ TN kody: 1001) Qazaqstan Respýblıkasynyń aýmaǵyna kóliktiń barlyq túrimen ákelýge tyıym salý týraly sheshim qabyldandy.
