Bıyl Qazaqstan 696 mlrd teńgege ınvestıtsııalyq kelisimshart jasady
2023 – ekonomıkalyq kún tártibin iske asyrýda jáne sheteldik ınvestıtsııalardy tartýda nátıjeli jyl boldy. Bul týraly QR Syrtqy ister mınıstrliginiń resmı ókili Aıbek Smadııarov jyldyń qorytyndy brıfınginde baıandady, dep habarlaıdy Kazinform.
Onyń aıtýynsha, bir ǵana Qytaı baǵytynda QR Prezıdentiniń memlekettik sapary nátıjesinde 16,54 mlrd AQSh dollaryna 30 qujatqa qol qoıyldy. Bul rette 21 mlrd AQSh dollaryna 52 birlesken jobany iske asyrý jalǵasýda.
Sondaı-aq, Qasym-Jomart Toqaevtyń BAÁ-ge saparynda jalpy somasy 4,7 mlrd AQSh dollaryn quraıtyn 10 ınvestıtsııalyq kelisimge qol qoıyldy.
«Jyl boıy Syrtqy ister mınıstrligi Qazaqstan Prezıdentiniń AQSh, Germanııa, Frantsııa, Katar, SAK jáne basqa elderdiń jetekshi transulttyq kompanııalarynyń basshylarymen kelissózderin pysyqtady. Biz elimizdiń Eýrazııa qurlyǵynyń ortalyǵynda ornalasqanyn eskere otyryp, tranzıttik-logıstıkalyq áleýetin nyǵaıtamyz. Qazaqstan ekonomıkasynda halyqaralyq qyzmetterdiń tutas salasy – logıstıka qalyptasty. Biz úshin Transkaspıı halyqaralyq kólik baǵytyn nemese Orta dálizdi odan ári damytý mańyzdy», - dedi Aıbek Smadııarov QR Syrtqy ister mınıstrliginde.
Qazaqstan bir jaǵynan Qytaı men Eýropa, Iran, ekinshi jaǵynan Ortalyq Azııa elderi arasyndaǵy konteınerlik temirjol tranzıtiniń senimdi býyny retinde ózin dáleldedi. Dıplomattar Transkaspıı halyqaralyq kólik baǵyty men «Qazaqstan – Túrikmenstan – Iran» temirjolyn odan ári ilgeriletý úshin maqsatty jumys júrgizgen. Ol boıynsha keleshekte tasymaldardyń 5 ese ulǵaıýy kútilýde.
2023 jyldyń I-jartyjyldyǵynyń qorytyndysy boıynsha Qazaqstanǵa tikeleı sheteldik ınvestıtsııalardyń jalpy aǵyny 13,3 mlrd AQSh dollaryn quraǵan. Ásirese salalar bólinisinde TShI eń kóp kólemi taý-ken ónerkásibine – 5,6 mlrd dollar, óńdeý ónerkásibine – 2,9 mlrd dollar, kóterme jáne bólshek saýdaǵa – 2,5 mlrd dollar, qarjy jáne saqtandyrý qyzmetine – 488,2 mln dollar, kólik jáne qoımaǵa – 577,8 mln dollar, qurylysqa – 189,8 mln dollar, kásiptik, ǵylymı jáne tehnıkalyq qyzmetke – 159,6 mln dollar, jyljymaıtyn múlikpen operatsııalarǵa – 234,3 mln dollar tartylǵan.
«Investıtsııalardy tartýdyń 3 deńgeıli júıesi arqyly jeltoqsan aıyndaǵy jaǵdaı boıynsha bizdiń elshilikter sheteldik kompanııalarmen 3 myńnan astam kezdesý ótkizip, olardyń Qazaqstanǵa 1400-den astam saparyn qamtamasyz etti. 2023 jylǵy 14 jeltoqsandaǵy jaǵdaı boıynsha jalpy ınvestıtsııa kólemi 696 mlrd teńge bolatyn 67 ınvestıtsııalyq kelisimshart jasaldy, ınvestıtsııalyq preferentsııalar berýge 450-den astam ótinim qaraldy. Álemniń 38 elinen 422 iri kompanııanyń tizimi quryldy. Qazir 78 kompanııa boıynsha naqty nátıjeler bar», - dedi A. Smadııarov.
Bıyl 17 qarashada Astanada «Kazakhstan Global Investment Roundtable 2023» atty iri halyqaralyq ınvestıtsııalyq shara ótti. Forým aıasynda 60-tan astam kezdesý ótkizilip, shamamen 1,8 mlrd AQSh dollaryn quraıtyn 28 qujatqa qol qoıyldy.
Sondaı-aq, jyl basynan beri «Kazakh Invest» UK» AQ sheteldik áriptestermen birlesip 23 iri ınvestıtsııalyq is-shara ótkizgen.