Bıyl qazaq sý sharýashylyǵy ǵylymı-zertteý ınstıtýty tórt granttyq jobany iske asyryp jatyr
ASTANA. KAZINFORM — Granttyq qarjylandyrý aıasynda Qazaq sý sharýashylyǵy ǵylymı-zertteý ınstıtýty ırrıgatsııa men melıoratsııa salalarynda tórt jobany júzege asyryp jatyr. Bul týraly vedomstvonyń baspasóz qyzmeti málim etti.
Sý resýrstary jáne ırrıgatsııa mınıstri Nurjan Nurjigitov ǵylymı uıymnyń jyl basynan beri atqarǵan jumysy týraly esebin tyńdady.
— Іske asyrylyp jatqan jobalar degradatsııalanǵan sýarmaly jerlerdiń jaǵdaıyn jaqsartý tehnologııasyn ázirleýdi, Jambyl oblysyndaǵy Shý ózeniniń tómengi aǵysyn sýmen qamtamasyz etýdiń ǵylymı-ádistemelik negizderin jasaýdy, shaǵyn sý ótkizý kólemi bar sýarý kanaldaryna qoldanýǵa bolatyn gıdrotehnıkalyq avtomattandyrylǵan qaqpanyń modelin ázirleýdi, sondaı-aq drenaj sýyn qaıta paıdalaný arqyly sýarmaly jerlerdiń sýmen qamtylýyn arttyrýdy qamtıdy, — delingen habarlamada.
Búginde «Sý shyǵyny az sýarý kanaldarynda qoldanýǵa arnalǵan gıdrotehnıkalyq avtomattandyrylǵan qaqpanyń modelin ázirleý» jobasy boıynsha modeldiń syzbasy, paıdalanýshy ınterfeısi jáne derekter bazasy daıyndaldy. Sonymen qatar Jambyl jáne Túrkistan oblystarynda avtomattandyrylǵan gıdrotehnıkalyq qaqpany paıdalaný boıynsha semınarlar ótkizildi.
«Jambyl oblysyndaǵy Shý ózeniniń tómengi aǵysyn sýmen qamtamasyz etýdiń ǵylymı-ádistemelik negizderi» jobasy aıasynda sý sharýashylyǵy is-sharalarynyń jospary ázirlendi. Sonymen birge QR Ǵylym jáne joǵary bilim mınıstrliginiń Ǵylym salasyndaǵy sapany qamtamasyz etý komıteti usynǵan otandyq retsenzııalanatyn basylymda eki maqala jarııalandy. Drenaj sýyn sýarý maqsatynda qaıta paıdalaný jobasy aıasynda aýyl sharýashylyǵy daqyldaryn drenaj sýymen sýarýǵa arnalǵan tehnologııa ázirlendi. Tehnologııaǵa patent alyndy, sondaı-aq bul ádis aýyl sharýashylyǵy óndirýshilerine tájirıbe júzinde kórsetildi. Retsenzııalanatyn ǵylymı basylymdarda maqalalar jarııalandy.
— Qazaqstannyń sý sharýashylyǵy salasyn damytý úshin ǵylym óte mańyzdy. Bizdiń mınıstrlik júzege asyratyn árbir jobanyń ǵylymı negizdemesi bolýy tıis. Sondyqtan Qazaq sý sharýashylyǵy ǵylymı-zertteý ınstıtýtyna úlken úmit artamyz. Búginde mınıstrlik ınstıtýtty qarjylandyrý máselesin tolyq sheshti. Endi sý resýrstaryn tıimdi paıdalanýǵa múmkindik beretin naqty nátıjeler qajet. Instıtýt mınıstrliktiń barlyq bastamasyna belsendi qatysyp, ár jobany jan-jaqty ǵylymı turǵydan taldaýy kerek, — dedi Sý resýrstary jáne ırrıgatsııa mınıstri Nurjan Nurjigitov.
Eske salsaq, Túrkistan oblysynyń Maqtaaral aýdanynda Qazaq sý sharýashylyǵy ǵylymı-zertteý ınstıtýtynyń mamandary tik drenaj uńǵymalaryn ornatý jáne paıdalaný kezinde shyǵyndy aıtarlyqtaı azaıtýǵa arnalǵan qubyrsyz sý tartý tehnologııasyn dalalyq jaǵdaıda synaqtan ótkizip jatyr.
Senat sý resýrstaryn qorǵaýǵa arnalǵan zańdy maquldady.