Bıyl qaı óńirlerde joldy tasqyn sý shaıý qaýpi bar
ASTANA. KAZINFORM – El óńirlerinde kóktemgi tasqyn sýdyń aldyn alý sharalary bastalyp ketti. Joldardaǵy jaǵdaı týraly QazAvtoJol ulttyq kompanııasynyń basqarma tóraǵasy Darhan Imanashev aıtyp berdi.
- Byltyr kóktemde sý tasqynynda 178 jol boıyn sý shaıdy. Joldar kúrdeli jáne ortasha jóndeýden ótti, sonymen qatar 2400 qubyr aýystyryldy. Qazir Tótenshe jaǵdaılar mınıstrligimen tyǵyz jumys istep jatyrmyz. Qazir qaýipti óńirler qatarynda Shyǵys Qazaqstan oblysy, Aqtóbe oblysy bar. Bizdiń quzyretimizge kóktem jaqyndaǵanda qubyrlardy tazalaý, qosymsha aryqtar qazý, qum salynǵan qapshyqtardy daıyndaý jatady. Bul jumystar istelip jatyr, - dedi Darhan Imanashev Úkimet otyrysynan keıin ótken baspasóz máslıhatynda.
Buǵan deıin habarlaǵanymyzdaı kóktemgi sý tasqynyna daıyndyq jumystaryndaǵy olqylyqqa baılanysty Oral qalasy men Qaratóbe aýdany ákimine (BQO) sógis jarııalandy.
Sondaı-aq Atyraý oblysynda kóktemgi sý tasqynyna qalaı daıyndalyp jatqany týraly habarlaǵan edik.