Bıyl kásipkerlerge qysym kórsetýdiń 100-ge tarta deregi anyqtaldy

ASTANA. KAZINFORM – Prokýratýra organdary bıznestiń zańdy múddelerin qorǵaý jáne kásipkerlerge qysym kórsetýdiń kez kelgen túrine jol bermeý baǵytynda júıeli sharalar qabyldap keledi.

Jyl basynda Ákimshilik quqyq buzýshylyq týraly kodekstiń 173-babyna kásipkerlik qyzmetke zańsyz aralasqany úshin jaýaptylyqty kúsheıtýge baǵyttalǵan ózgerister engizildi. Naýryz aıynda kúshine engen bul túzetýler jaýapty tulǵalar sheńberin keńeıtip, kásipkerlerdiń zańdy qyzmetine kedergi keltiretin áreketter men áreketsizdik úshin jazalaý sharalaryn qatańdatty.

Prokýratýra organdary osy saladaǵy quqyq buzýshylyqtardy anyqtaý boıynsha baqylaýdy kúsheıtti. Ótken jyldyń toǵyz aıynda 49 zańsyz aralasý faktisi tirkelse, bıyl olardyń sany eki eseden asa ósip, 98-ge jetti. Onyń ishinde 92 ákimshilik is qaralyp, kináli tulǵalar jaýapqa tartyldy. Jalpy somasy 18 mln teńge aıyppul salyndy.

- Mysaly, elordada jer qatynastary salasynyń qyzmetkeri óz ókilettigin asyra paıdalanyp, kásipkerge tıesili nysandardy buzýdy tapsyrǵan. Pavlodar oblysynda aýyl sharýashylyǵy basqarmasynyń basshysy ákimderge jeńildetilgen nesıeleý baǵdarlamasynda kózdelmegen qujattardy talap etýdi mindettegen. Mańǵystaý oblysynda memlekettik kirister basqarmasynyń ınspektory kásipkerdi zańsyz túrde QQS tirkeý esebinen shyǵaryp tastaǵan. Aqtóbe oblysynda jer qatynastary basqarmasy basshysynyń orynbasary jer qoınaýyn paıdalanýshyǵa kelisimshartqa sáıkes jer ýchaskesin berýden negizsiz bas tartqan. Al Jetisý oblysynda aýdan ákiminiń orynbasary kásipkerdiń avtovokzalyn qaladan tys jerge kóshirýdi zańsyz talap etken, - dep jazdy baqylaýshy organnan.

Barlyq faktiler boıynsha kináli tulǵalar ákimshilik jaýapkershilikke tartyldy.

Prokýratýra ókilderi bul baǵyttaǵy jumystyń júıeli túrde jalǵasatynyn jáne erekshe baqylaýda bolatynyn atap ótti.

Sonymen qatar Bas prokýratýra kásipkerlerge zańsyz aralasý jaǵdaılarynda Call-ortalyqqa júginýdi usynady. Baılanys telefondary: 8 [phone], 8-702-629-75-61.

Aıta keteıik, SQO-da 840 mln teńgeni jymqyrǵan kásipkerge qatysty úkim ózgerissiz qaldy.