Bıyl Qashaǵanda gaz óńdeý zaýyty iske qosylady

ASTANA. KAZINFORM — Energetıka mınıstri Erlan Aqkenjenov vedomstvonyń keńeıtilgen alqa májilisinde Qashaǵandaǵy qýaty 1 mlrd tekshe metr bolatyn gaz óńdeý zaýyty iske qosylatynyn eske saldy.

— 2026 jyly Qashaǵandaǵy qýaty 1 mlrd tekshe metr bolatyn gaz óńdeý zaýyty iske qosylady. Jańaózendegi 0,9 mlrd tekshe metr «QazGPZ» jobasy boıynsha memlekettik qorytyndy alynady. Qashaǵandaǵy 2,5 mlrd tekshe metrlik GÓZ boıynsha tehnıkalyq-ekonomıkalyq negizdeme ázirlenip, bekitiledi, — dedi mınıstr.

Onyń aıtýynsha, 2025 jyly gaz óndirý kólemi 68,2 mlrd tekshe metr bolyp, jospar 8,6% artyq oryndalǵan.

Buǵan deıin, mınıstr Erlan Aqkenjenov Qarashyǵanaq gaz óńdeý zaýytynyń jobalyq qujattaryn ázirleý bastalǵanyn málim etken bolatyn. 

Sonymen qatar, Qazaqstan 2025 jyly 78,7 mln tonna munaı eksporttaǵanyn aıtty.

Budan bólek, bıyl da bıtým eksportyna tyıym salynatyny belgili boldy.