Bıyl Qarýly kúshterde jarǵylyq emes qatynastardyń 13 faktisi tirkeldi
ASTANA. KAZINFORM – Bıyl Qarýly kúshterde jarǵylyq emes qatynastardyń 13 faktisi tirkeldi. Qorǵanys mınıstriniń tárbıe jáne ıdeologııalyq jumys jónindegi orynbasary, general-maıor Shaıh-Hasan Jazyqbaev aıtty.
«Beıbit ýaqytta áskerı qyzmetshilerdiń shyǵyny jaýyngerlik emes shyǵyndar dep atalady. Kez kelgen oqıǵa boıynsha muqııat tekserý júrgizilip, áskerı basqarý organdarynyń birinshi basshylaryna qatań tártiptik jáne kadrlyq sheshimder qabyldanady. Biraq bul jerde biz qandaı sharalar qabyldamasaq ta bári qyzmet etetin adamǵa baılanysty ekenin túsiný kerek. Áskerge shaqyrylǵan azamattar qazirdiń ózinde qalyptasqan dúnıetanymmen jáne otbasynda, mektepte, dostarynyń ortasynda alǵan tárbıemen keledi. Mundaı jaǵdaılarda barlyq shara men tyıym dármensiz», - dedi general-maıor Ortalyq kommýnıkatsııalar qyzmetindegi brıfıngide.
Onyń dereginshe, Qarýly kúshterdegi keıingi úsh jylda jarǵylyq emes qatynastar negizinde jasalǵan qylmystar sany 28 paıyzǵa tómendegen. ıAǵnı, 2021 jylǵy 32-den 2023 jyly 23-ke deıin tústi. Barlyǵy 12 áskerı qyzmetshi sottaldy.
«Osy jyldyń ótken kezeńinde jarǵylyq emes qatynastardyń 13 faktisi tirkeldi. Sonymen qatar meniń oıymsha, biz óz jumysymyzdy quqyq buzýshylyqtar sany boıynsha emes, jaýyngerlik daıarlyq, Qarýly kúshterdiń jaýyngerlik ázirligin qamtamasyz etý mindetterin oryndaý sapasy boıynsha baǵalaýymyz kerek. Degenmen, biz áskerı qyzmettiń qaýipsizdigin qamtamasyz etýdiń mańyzdylyǵyn túsinemiz jáne tıisti sharalardy qabyldaımyz», - dedi Shaıh-Hasan Jazyqbaev.
