Bıyl qant zaýyttary 850 myń tonna qyzylsha qabyldaıdy

ASTANA. KAZINFORM – Úkimet otyrysynda Premer-mınıstr Oljas Bektenov qant qyzylshasyn ósirip otyrǵan dıqandardyń jaǵdaıyna alańdaýshylyq bildirdi.

- Byltyr qant qyzylshasy boıynsha problema bolǵan edi. Bıyl qalaı bolyp jatyr, - dep surady Premer-mınıstr.

Aıdarbek Saparov Úkimet basshysyn bıyl ondaı problema bolmaıtynyna sendirdi.

- Byltyr shynymen de 25 myń gektar alqaptan 1 mln 300 tonna kóleminde rekordtyq ónim alǵanbyz. Sizdiń tapsyrmańyzdan keıin biz alqapty ártaraptandyryp, 25 myń gektardan 19 myń gektarǵa deıin qysqarttyq. Byltyr 1,3 mln tonna alsaq, bıyl boljam boıynsha 850 myń tonna alamyz dep otyrmyz. Búgin sonyń 43 paıyzy jınap alyndy. Osy jınalǵan 363 myń tonnanyń 277 myń tonnasy zaýyttarǵa ótkizildi. Bıyl jalpy Merkidegi zaýytqa 300 myń tonna, Aqsýǵa 300 myń tonna, Kóksýǵa 250 myń tonna ótkiziledi. Úsh zaýyt ta istep tur. Kerek kómektiń bárin berip jatyrmyz, - dedi mınıstr.

Aıta keteıik, Qazaqstan bıyl 16 mln gektar alqaptan 27,1 mln tonna astyq aldy.