Bıyl qansha qazaqstandyq jumys ornynda zardap shekti
ASTANA. KAZINFORM – Memlekettik eńbek ınspektsııasy komıtetiniń málimetine súıensek, kóbine taý-ken metallýrgııa salasynda eńbek etetin jandar jaraqat alady. Olardyń úlesi 17,4%, sodan soń qurylys salasy – 10,3%, odan keıin munaı-gaz salasy – 5,6%.
Bul týraly Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov málim etti.
- Bıyl 10 aıdyń qorytyndysy boıynsha kásiporyndarda 1 029 adam zardap shekti. Bul kórsetkish 2024 jyldyń 10 aıymen salystyrǵanda 4,5% az (byltyr 1 078 adam jaraqat alǵan). Onyń ishinde 145 adam qaza tapty, bul ótken jylmen salystyrǵanda 6,5% tómen (2024 jyly 155 adam). Jumys ornynda jaraqat alý deńgeıi joǵary óńirler qatarynda Qaraǵandy, Shyǵys Qazaqstan, Aqtóbe, Pavlodar, Qostanaı oblystary jáne Almaty qalasy bar, - dedi Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda.
Memlekettik eńbek ınspektsııasy komıtetiniń málimetine súıensek, kóbine taý-ken metallýrgııa salasynda eńbek etetinder jaraqat alady, olardyń úlesi 17,4%, sodan soń qurylys salasy – 10,3% jáne munaı-gaz salasy – 5,6%.
- Jumysshylardyń áleýmettik turǵydan qorǵalýyn arttyrý maqsatynda óndiristegi jazataıym oqıǵalardan mindetti saqtandyrý júıesiniń qamtý aıasyn keńeıtý boıynsha jumystar júrgizilip jatyr. Búginde 112 354 kásiporyn óz qyzmetkerlerimen saqtandyrý sharttaryn jasasqan, bul elimizdegi jalpy zańdy tulǵalardyń 64,7 paıyzy. Qurylys jáne taý-ken óndirý salasynda kásibı táýekelder joǵary kásiporyndarǵa erekshe baqylaý ornatylǵan. Jarty jylda bir ret profılaktıkalyq baqylaýdan ótetin kásiporyndardyń tizimi avtomatty túrde qalyptasady. Bul júıeli zań buzýshylyqtardy nysanaly túrde joıýǵa múmkindik beredi. Bıyl ekinshi jartyjyldyqta 314 kásiporyn tizimge engizilip, onyń 138-i tekserýden ótti, - deıdi Eńbek mınıstrliginiń ókili.
Aıta ketsek, jyl basynan beri eńbek qaýipsizdigin saqtamaǵan jumys berýshilerge 428 mln teńgeden astam aıyppul salyndy.
Sondaı-aq brıfıng barysynda jumysshylar aldynda jalaqy qaryzy kóp óńirler ataldy.