Bıyl qansha elektr stansasy jóndeýden ótedi
ASTANA. KAZINFORM — Úkimet otyrysynda Energetıka mınıstri Almasadam Sátqalıev aldaǵy jylytý maýsymyna qalaı daıyndalatynyn aıtty.
«Aldaǵy jylytý maýsymyna daıyndyq aıasynda bıyl elektr stantsııalarynda 10 energoblokty, 55 qazandyqty jáne 45 týrbınany jóndeý josparlanǵan. 2 energoblokta, 12 qazandyq pen 2 týrbınadaǵy jóndeý jumystary ár túrli satysynda tur. 1 energoblok pen 1 qazandyqta jáne 4 týrbınada jóndeý jumystary aıaqtaldy», — dedi ol.
Mınıstrdiń sózinshe, jalpy uzyndyǵy 20 myń shaqyrymnan astam elektr jelisi jańarady.
«Jalpy uzyndyǵy 20,9 myń shaqyrym bolatyn elektr berý jelilerin, sondaı-aq joǵary kerneýli 423 kishi stantsııany jóndeý josparlanǵan. Elektr jelilerin jóndeý bekitilgen grafıkterge sáıkes júrgizilip jatyr. Barlyq óńirlerdegi elektr stantsııalarynda jóndeý jumystary grafıkterge sáıkes júrgizilýde, keshigip jatqan joq», — dedi Almasadam Sátqalıev.
